وزیراعظم کے معاون خصوصی برائے سیاسی ابلاغ  ڈاکٹر شہباز گل کا کہنا ہے کہ الیکشن کے معاملے میں آج بھی پاکستان پتھر کے زمانے میں ہے۔

تفصیلات کے مطابق وزیر اعظم کے معاون خصوصی برائے سیاسی ابلاغ  ڈاکٹر شہباز گل نے شاہد خاقان عباسی اور احسن اقبال کے بیان پر ردعمل دیتے ہوئے کہا کہ پی ٹی آئی نے الیکشن اصلاحات شفافیت کیلئے کی ہے۔

وزیراعظم کے معاون خصوصی کا کہنا ہے کہ دھاندلی کا رونا رونے والے شفاف انتخابات کروانے سے خائف ہیں، ماضی میں ہر الیکشن کے بعد دھاندلی کے نعرے بلند کیے جاتے رہے، الیکشن کے معاملے میں آج بھی پاکستان پتھر کے زمانے میں ہے۔

شہباز گل نے کہا کہ دنیا ٹیکنالوجی کے استعمال سے کہاں سے کہاں پہنچ چکی ہے، کچھ لوگ آج بھی مشین کے استعمال سے خوف زدہ ہیں، اداروں کو میاں مفرور کھلے عام دھمکاتے رہے، اداروں کو اپنی کرپشن کی نظر کر کے کھوکھلا کرنے والے آپ ہیں۔

وزیر اعظم کے معاون خصوصی برائے سیاسی ابلاغ  ڈاکٹر شہباز گل نے مزید کہا کہ آج ن لیگ کے درباریوں کو دیکھ کر ڈوبتے کو تنکے کا سہارا والی کہاوت یاد آتی ہے، جتنا مرضی رو لیں الیکٹرانک ووٹنگ ہو کر رہے گی۔