سابق وفاقی وزیر خزانہ اسحاق ڈار نے کہا ہے کہ اتحادی حکومت کے دور رس اقدامات کی وجہ سے آج ملک کی معیشت بہتری کی طرف گامزن ہے۔
تفصیلات کے مطابق گورنر پنجاب محمد بلیغ الرحمان سے سینیٹ میں قائد ایوان اسحاق ڈار کی ملاقات ہوئی جس میں ملک کی معیشت اور موجودہ صورتحال پر تبادلہ خیال ہوا۔
گورنر پنجاب نے اسحاق ڈار کی بحیثیت سابق وفاقی وزیر خزانہ خدمات کو سراہتے ہوئے کہا کہ انہوں نے ہر مشکل وقت میں ملک کی معیشت کو سنبھالا اور صحیح ڈگر پر ڈالا۔
انہوں نے کہا کہ اسحاق ڈار نے 1998 میں ایٹمی دھماکوں کے بعد معاشی پابندیوں کے باوجود ملک کی معیشت کو گرداب سے نکالا، ماضی قریب میں ملک کو ڈیفالٹ سے بچانے کے لیے اسحاق ڈار کی محمد نواز شریف اور ان کی ٹیم کے ساتھ کوششیں کامیاب رہیں۔
بلیغ الرحمان نے کہا کہ قائد مسلم لیگ (ن) محمد نواز شریف کی 21 اکتوبر کو وطن واپسی عوام کے لیے امید کی کرن ہے، تاریخ گواہ ہے کہ انہوں نے ہمیشہ ملک کی خدمت کی ہے، ان کے ادوار میں ملک نے بے پناہ ترقی کی۔
گورنر پنجاب نے مزید کہا کہ ملک میں انفرا اسٹرکچر، تعلیم اور صحت کے شعبوں میں مثالی ترقی ہوئی اور ملک میں موٹر ویز، اسپتال اور یونیورسٹیاں بنیں۔
دوسری جانب اسحاق ڈار نے گفتگو کرتے ہوئے کہا کہ ماضی قریب میں اتحادی حکومت کی ان تھک کوششوں کی وجہ ملک کو دیوالیہ کرنے کا منصوبہ کامیاب نہیں ہو سکا، اتحادی حکومت کے دور رس اقدامات کی وجہ سے آج ملک کی معیشت بہتری کی طرف گامزن ہے، ڈالر کے مقابلے میں روپیہ مستحکم ہو رہا ہے۔
انہوں نے مزید کہا کہ قائد مسلم لیگ (ن) محمد نواز شریف انشاء اللہ 21 اکتوبر کو پاکستان آ رہے ہیں، انہوں نے پہلے بھی ملک کو بحران سے نکالنے میں موثر کردار ادا کیا ہے اور آئندہ بھی ملک کی ترقی میں کردار ادا کریں گے۔
اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں
ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں
پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں اور بیل آئیکن پر کلک کریں
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News