اسلام آباد: صدر مملکت ڈاکٹر عارف علوی نے 3 دسمبر، معذور افراد کے عالمی دن کے موقع پر ایک پیغام جاری کیا ہے۔

صدر پاکستان عارف علوی نے آج منائے جانے والے معذور افراد کے عالمی دن کے موقع پر اپنے جاری کردہ پیغام میں کہا کہ ہمیں معذور افراد کو ان کی صلاحیتوں کی بنیاد پر جامع تعلیم، صحت کی سہولیات اور روزگار فراہم کر کے ان کے لیے سازگار اور دوستانہ ماحول پیدا کرنے کی ضرورت ہے۔

عارف علوی نے حکومتی اداروں اور سول سوسائٹی پر زور دیا ہے کہ وہ معذور افراد کو زندگی کے تمام شعبوں میں شامل کرنے کے لیے خصوصی کوششیں کریں۔

صدر مملکت نے مزید کہا کہ پاکستان معذور افراد کے کامیابی کے سفر میں رکاوٹ بننے والی سماجی رکاوٹوں کو ختم کرنے کے اپنے مشن کے لیے پرعزم ہے۔

واضح رہے کہ آج دنیا بھر میں معذور افراد کا عالمی دن منایا جا رہا ہے، پاکستان میں بسنے والے تقریباً ساڑھے تین کروڑ معذور عوام جنہیں اسپیشل پرسن کہا جاتا ہے، ان کے ساتھ حکومت معاشرے، اداروں اور اپنوں کا سلوک بد ترین ہے۔

انتہائی افسوس کے ساتھ کہنا پڑتا ہے کہ پاکستان میں 76سال گزرنے کے بعد بھی معذور افراد کا مستقبل تاریک نظر آتا ہے کہ ہر طرف ہم معذور افراد کو سڑکوں اور چوراہوں پر بھیک مانگتے ہی دیکھتے ہیں۔