وزیراعلیٰ پنجاب مریم نواز نے کہا ہے کہ کلینکس آن ویل پراجیکٹ شعبہ صحت کو مکمل طور پر بدل دے گا۔

وزیراعلیٰ مریم نواز نے کلینکس آن ویل پراجیکٹ کی تقریب سے خطاب کرتے ہوئے کہا کہ کلینکس آن ویلز میں تمام بنیادی طبی سہولیات موجود ہیں، ہم 200 کلینکس آن ویلز کو مختلف پوائنٹس پر اسٹینڈ کریں گے۔

انہوں نے کہا کہ 200 میں سے 50 گاڑیوں میں الٹراساؤنڈ کی سہولت موجود ہوگی، کلینکس آن ویل میں ایک ڈاکٹر ہوگا اور ٹیسٹس کی سہولت بھی موجود ہوگی، 40 لاکھ افراد کلینکس آن ویلز پراجیکٹ سے مستفید ہوں گے، کلینکس آن ویل کے اندر زچہ و بچہ کیلئے بھی سہولیات ہوں گی۔

مریم نواز نے کہا کہ کلینکس آن ویل اس جگہ پارک ہوں گی جہاں ہسپتال کی سہولت دور ہو، کلینکس آن ویل میں سکریننگ اور ویکسی نیشن کی سہولت بھی موجود ہوگی

وزیراعلیٰ پنجاب نے کہا کہ کنٹینرز کو احتجاج کیلئے نہیں علاج کیلئے بھی استعمال کیا جاسکتا ہے، عوام کو سہولت فراہم کرنے کیلئے اقدامات کررہے ہیں۔

انکا کہنا تھا کہ سچ ہے 2 سے 3ماہ حکومت کو سیدھا کرنے میں لگ جاتے ہیں، شہبازشریف کو الٹے کاموں کو سیدھا کرنے میں 4 سے 5 ماہ لگ گئے۔

مریم نواز نے مزید کہا کہ جب بھی کوئی منصوبہ لاتے ہیں سب سے زیادہ خوش نواز شریف ہوتے ہیں، ہم شہبازشریف اور نواز شریف کے منصوبوں کو دوبارہ سیدھا کر رہے ہیں۔