اسلام آباد: مشرق وسطیٰ کی بگڑتی ہوئی صورتحال اور ایران امریکا جنگ کے تناظر میں آج اسلام آباد میں اہم سفارتی بیٹھک ہورہی ہے۔
نائب وزیراعظم اسحاق ڈار کی دعوت پر پاکستان، سعودی عرب، مصر اور ترکی کے وزرائے خارجہ خطے کی صورتحال پر مشاورت کریں گے۔
اسلام آباد آج بھرپور سفارتی سرگرمیوں کا مرکز بن گیا ہے۔ مصر کے وزیر خارجہ ڈاکٹر بدر عبدالعاطی پہلے ہی اسلام آباد پہنچ گئے تھے جب کہ ترکیہ اور سعودی عرب کے وزرائے خارجہ بھی دفتر خارجہ پہنچ گئے ہیں۔
نائب وزیراعظم و وزیر خارجہ اسحاق ڈار نے دفتر خارجہ میں ترکیہ کے وزیر خارجہ حقان فیدان سے ملاقات کی، جس میں دونوں ممالک نے اپنے مضبوط دوطرفہ تعلقات کے عزم کا اعادہ کیا۔
ملاقات کے دوران خطے کی مجموعی صورتحال اور ایران سے متعلق امور پر تفصیلی تبادلہ خیال کیا گیا۔ دونوں رہنماؤں نے کشیدگی میں کمی اور مسائل کے حل کے لیے سفارتی ذرائع کو ترجیح دینے پر زور دیا۔
اس موقع پر وزرائے خارجہ نے خطے میں امن و استحکام کے فروغ کے لیے قریبی رابطہ کاری جاری رکھنے پر اتفاق کیا جب کہ پاکستان اور ترکیہ نے علاقائی امن کے حوالے سے اپنے مشترکہ مؤقف کو بھی دہرایا۔
یاد رہے کہ نائب وزیراعظم اسحاق ڈار 4 ملکی اجلاس کی صدارت کریں گے۔ سفارتی ذرائع کے مطابق اجلاس میں ایران سے متعلق مذاکرات کے سلسلے میں چاروں ممالک کے درمیان مشاورت کی جائے گی۔
ذرائع کا کہنا ہے کہ آج سعودی عرب، ترکیے اور مصر کے پاکستان کے ساتھ الگ الگ دوطرفہ مذاکرات بھی ہوں گے۔ چاروں وزرائے خارجہ کی دوطرفہ ملاقاتیں بھی ہوں گی۔ تینوں ملکوں کے وزرائے خارجہ کو نائب وزیراعظم ظہرانہ بھی دیں گے۔
پاکستان کی میزبانی میں ہونے والی یہ اہم سفارتی بیٹھک ایسے وقت میں ہورہی ہے جب امریکا اور ایران کے درمیان کشیدگی عروج پر ہے اور بین الاقوامی برادری جنگ کے خاتمے کے لیے مذاکراتی کوششوں میں مصروف ہے۔
واضح رہے کہ پاکستان نے پہلے ہی امریکا اور ایران کے درمیان مذاکرات کی میزبانی کے لیے آمادگی ظاہر کی تھی۔
