ساتویں آئی سی سی ویمنز ٹی ٹوئنٹی ورلڈکپ سے قبل وارم  اپ مرحلہ ہفتہ سے شروع ہوگا ۔ ورام اپ مرحلے میں مختلف ٹیموں کے درمیان دس میچز کھیلے جائیں گے۔

تفصیلات کے مطابق آسٹریلیا میں کھیلے جانے والے آئی سی سی ویمنز ٹی ٹوئنٹی ورلڈکپ کے وارم  اپ مقابلوں کا آغاز میزبان اور ویسٹ انڈیز کے درمیان میچ سے 15 فروری (کل ) کو ہونا  تھا   جو اب 16 فروری (اتوار )سے ہوگا۔

آسٹریلیا میں گذشتہ دنوں میں  ہونے والی شدید بارشوں کے سبب گراؤنڈ کی آؤٹ فیلڈ متاثر  ہے جس کی بنا پر میچ منسوخ کردیا  گیاہے۔

16 فروری کو چار میچز کھیلے جائیں گے جس میں پہلا میچ سری لنکا اور جنوبی افریقہ ، دوسرا میچ بنگلہ دیش اور تھائی لینڈ ، تیسرا میچ انگلینڈ اور نیوزی لینڈ جبکہ چوتھا میچ روایتی حریفوں بھارت اور پاکستان کے درمیان کھیلا جائے گا۔

وارم اپ مرحلے میں 18 فروری کو تین میچز کھیلے جائیں گے جس میں پہلا میچ آسٹریلیا اور جنوبی افریقہ ، دوسرا میچ بھارت اور ویسٹ انڈیز جبکہ تیسرا میچ انگلینڈ اور سری لنکا کے درمیان کھیلا جائے گا۔

19 فروری کو ایک  وارم اپ میچ کھیلا جائے گا جس میں نیوزی لینڈ اور تھائی لینڈ کی ٹیمیں آمنے سامنے ہوں گی جبکہ 20 فروری کو آخری وارم اپ میچ کھیلا جائے گا جس میں بنگلہ دیش اور پاکستان کی ٹیمیں پنجہ آزمائی کریں گی۔

واضح رہے کہ ساتواں آئی سی سی ویمنز ٹی ٹوئنٹی ورلڈ کپ 21 فروری سے آسٹریلیا میں شروع ہوگا جس میں 10 ٹیمیں ٹائٹل کے حصول  کے لیے پنجہ آزمائی کریں گی۔ ٹیموں کو دو گروپس میں تقسیم کیا گیا ہے۔

پہلے  گروپ میں  دفاعی چیمپئن آسٹریلیا ، بھارت، نیوزی لینڈ، سری لنکا اور بنگلیہ دیش کی ٹیمیں شامل ہیں جبکہ دوسرے گروپ میں پاکستان، انگلینڈ، جنوبی افریقہ،ویسٹ انڈیز  سمیت ورلڈ کپ میں پہلی مرتبہ کوالیفائی کرنے والی ٹیم تھائی لینڈ شامل ہے۔