آل پاکستان رینکنگ بیڈمنٹن ٹورنامنٹ نیشنل کے پی مراد علی نے سنسنی خیز مقابلے کے بعد جیت لیا جبکہ خواتین کا ٹائٹل واپڈا کی ماحور شہزاد کے نام رہا۔

پاک فوج اور پاکستان بیڈمنٹن فیڈریشن کے زیراہتمام آل پاکستان نیشنل رینکنگ بیڈمنٹن چیمپئن شپ گیریژن اسپورٹس کلب بہاولپور میں اختتام پذیر ہوگئی۔

 مینز سنگلز فائنل میں مراد علی (کے پی) نے عرفان سعید (واپڈا) کو شکست دی۔  ویمنز سنگلز فائنل میں ماہور شہزاد (واپڈا) نے غزالہ صدیق (واپڈا) کو شکست دی۔

مینز ڈبلز فائنل میں راجہ ذوالقرنین حیدر (واپڈا) اور راجہ محمد حسنین (آرمی) نے ابوذر رشید اور یاسر علی (ایچ ای سی) کو شکست دی، ویمنز ڈبل کے فائنل میں ماہور شہزاد اور غزالہ صدیق (واپڈا) نے عمارہ اشتیاق اور روشین اعجاز (سندھ) کو شکست دی۔

ایونٹ میں پاکستان بھر سے کل 164 کھلاڑیوں جس میں 119 مرد اور 45 خواتین اور 12 آفیشلز بشمول محکموں اور صوبوں نے شرکت کی۔

ایونٹ کا مقصد گراس روٹ کی سطح پر بیڈمنٹن کو فروغ دینا اور پاکستان بھر سے ابھرتے ہوئے ٹیلنٹ کا شکار کرنا تھا۔

 بیڈمنٹن ٹورنامنٹ کی تاریخ میں 1.5 ملین روپے کا سب سے بڑا نقد انعام ایونٹ کے پہلے راؤنڈ سے دیا گیا، میچوں کے علاوہ ٹورنامنٹ کے دوران 5 جولائی کو ورلڈ بیڈمنٹن ڈے بھی منایا گیا۔

 اختتامی تقریب سے خطاب کرتے ہوئے معزز مہمان خصوصی نے صحت مند کھیلوں کی سرگرمیوں کو فروغ دینے کے لیے پاک فوج اور پی بی ایف کی کاوشوں کو سراہا۔

انہوں نے کہا کہ یہ ٹورنامنٹ بیڈمنٹن جیسے کم کھیلے جانے والے کھیلوں کے ٹیلنٹ کو فروغ دینے کا ایک اقدام ہے۔

انہوں نے کہا کہ یہ ایونٹ نہ صرف نوجوان کھلاڑیوں کو بیڈمنٹن میں اپنی صلاحیتوں کے اظہار کا موقع فراہم کرے گا بلکہ مستقبل کے کھلاڑیوں کو بھی اجاگر کرے گا۔