تازہ ترین ٹی ٹوئنٹی رینکنگ میں بھارتی لیگ اسپنر روی بشنوئی دنیا کے نمبرون بولر بن گئے ہیں۔

بھارتی لیگ اسپنر روی بشنوئی نے آسٹریلیا کے خلاف ہوم سیریز میں شاندار پرفارمنس کے بعد چار درجہ ترقی پا کر افغان اسپنر راشد خان سے ٹاپ پوزیشن چھین لی ہے جب کہ وہ آئی سی سی کی تازہ ترین ٹی ٹوئنٹی رینکنگ میں دنیا کے نمبر ون بولر بن گئے ہیں۔

روی بشنوئی نے آسٹریلیا کے خلاف پانچ ٹی ٹوئنٹی میچز میں 9 وکٹیں حاصل کرکے سیریز کے بہترین کھلاڑی کا اعزاز بھی حاصل کیا تھا۔

23 سالہ کھلاڑی نے 2022 میں ویسٹ انڈیز کے خلاف ٹی ٹوئنٹی ڈیبیو کے بعد سے اب تک 21 ٹی ٹوئنٹی انٹرنیشنل میچوں میں 34 وکٹیں حاصل کر رکھی ہیں۔

روی بشنوئی کی ٹاپ پوزیشن سے راشد خان سمیت وینندو ہسرنگا، عادل رشید اور مہیش تھیکشانہ کی عالمی رینکنگ میں ایک، ایک درجہ تنزلی ہوئی ہے۔

آئی سی سی ٹی ٹوئنٹی بولرز رینکنگ میں بھارت کے روی بشنوئی 699 پوائنٹس کے ساتھ پہلے، راشد خان 692 پوائنٹس کے ساتھ دوسرے اور وینندو ہسرنگا 679 پوائنٹس کے ساتھ تیسرے نمبر پر موجود ہیں۔

بلے بازوں کی رینکنگ میں بھی بھارت کے سوریا کمار 855 پوائنٹس کے ساتھ بدستور پہلی پوزیشن پر موجود ہیں جب کہ پاکستان کے محمد رضوان کا 787 پوائنٹس کے ساتھ دوسرا نمبر ہے۔

جنوبی افریقہ کے ایڈن مارکرم 756 پوائنٹس کے ساتھ تیسری اور پاکستان کے سابق کپتان بابراعظم 734 پوائنٹس کے ساتھ چوتھی پوزیشن پر موجود ہیں۔