یورپی فٹبال تنظیم، ایشیائی فٹبال تنظیم اور شمالی و وسطی امریکا کی فٹبال تنظیم نے فیفا کے صدر جیانی انفینٹینو سے مستعفی ہونے کا مطالبہ کردیا۔
تینوں تنظیموں کے سربراہان نے مشترکہ خط میں کہا ہے کہ فٹبال کو ایسی قیادت کی ضرورت ہے جو کھیل کی خدمت کرے، نہ کہ اختیارات پر قابض ہونے کی کوشش کرے۔
یورپی فٹبال تنظیم کے صدر الیگزینڈر چیفرین، ایشیائی فٹبال تنظیم کے سربراہ شیخ سلمان بن ابراہیم الخلیفہ اور شمالی و وسطی امریکا کی فٹبال تنظیم کے صدر وکٹر مونٹالیانی نے مشترکہ خط جاری کیا۔
خط میں کہا گیا کہ قیادت کسی فرد کی ملکیت نہیں ہوتی بلکہ یہ فٹبال سے وابستہ اداروں کی خدمت کی ذمہ داری ہوتی ہے۔ اعتماد کو دھوکا دہی سے نقصان پہنچایا گیا اور اس ذمہ داری کو پورا نہیں کیا گیا۔
تینوں تنظیموں نے فیفا کے اندر پیدا ہونے والے بحران پر شدید تحفظات کا اظہار کرتے ہوئے معاملے کی فٹبال سے باہر کسی آزاد ادارے کے ذریعے تحقیقات کا مطالبہ بھی کیا ہے۔
رپورٹس کے مطابق یورپی فٹبال تنظیم کی جانب سے فیفا کے بعض مقابلوں کے بائیکاٹ کی دھمکیوں کے بعد نئی طرز کے مقابلوں کے انعقاد پر بھی ابتدائی بات چیت شروع کردی گئی ہے۔
خط میں فیفا کے سربراہ پر تنقید کرتے ہوئے کہا گیا کہ معاملے کو صرف رابطوں کی ناکامی قرار دینا درست نہیں بلکہ یہ فیصلہ سازی کی ناکامی ہے۔
تینوں تنظیموں نے واضح کیا کہ قیادت کی تبدیلی کی صورت میں رکن ممالک کو ملنے والی مالی معاونت متاثر نہیں ہوگی۔
فیفا کے نئے صدر کے انتخاب کے لیے امیدواروں کو 18 نومبر تک اپنی نامزدگی ظاہر کرنا ہوگی جب کہ انفینٹینو کی جگہ نئے امیدوار کے انتخاب کے لیے مختلف امکانات پر غور کیا جارہا ہے۔
دوسری جانب افریقی اور جنوبی امریکی فٹبال تنظیموں نے حالیہ دنوں میں انفینٹینو کی حمایت کا اعلان کیا ہے۔
