بھارت میں لوگوں نے کورونا وائرس کی وجہ سے مجبوراً درختوں پر آسولیشن اختیار کرلی۔

بھارتی میڈیا کے مطابق بھارت کے جنوبی شہر چنئی سے مغربی بنگال کے پورولیا ضلع میں آنے والے 7 افراد کو حکام کی جانب سے قرنطینہ میں رہنے کا مشورہ دیا گیا تھا۔

ان 7 افراد پر مشتمل اس گروپ نے گھروں میں الگ جگہ موجود نہ ہونے پر اپنے گھر والوں اور پڑوسیوں کو محفوظ رکھنے کے لیے درخت کی شاخوں میں بستر بنالیے۔

درخت پر قرنطینہ کے دن گزارنے والے ایک شہری کا کہنا تھا کہ دیہی ڈاکٹر نے ہمیں گھر پر الگ رہنے اور قرنطینہ میں دن گزارنے کی ہدایت کی تھی لیکن گاؤں میں ذاتی کمرے نہیں ہیں تو ہم نے فیصلہ کیا گیا درختوں پر قرنطینہ کے دن گزاریں۔

بھارتی شہری کا کہنا تھا کہ ’ہم اپنی مرضی سے درختوں پر رہ رہے ہیں ، ہمیں یہاں کوئی پریشانی نہیں ہے۔‘

دوسری جانب انڈیا کی ریاست آسام میں ریلوے حکام نے ٹرین کی بوگیوں کو کورونا وائرس کے شکار مریضوں کے لیے قرنطینہ میں بدل دیا ہے۔

گوہاٹی شہر کے ریلوے سٹیشن پر ٹرین کی پانچ بوگیوں میں آئیسولیشن وارڈز تیار کیے گئے ہیں۔

 ریلوے حکام کا کہنا ہے کہ کورونا وائرس سے نمٹنے کے لیے خصوصی انتظامات کے تحت 637 بوگیوں کو قرنطینہ بنایا جائے گا ۔

واضح رہے کہ کرونا وائرس کے پیش نظر حکومت نے پورے ملک میں لاک ڈاؤن کررکھا ہے، بھارت میں کرونا وائرس کے 1071 کیسز سامنے آچکے ہیں اور 29 افراد ہلاک ہوچکے ہیں۔