گزشتہ رات یورپی ملک اسپین اور یونان میں سپر مون کے نظارے کیے گئے۔

بین الاقوامی خبر رساں ادارے کے  مطابق یونانی  دارالحکومت ایتھنز کے ساحل پر 2022 کا سب سے بڑا ’سپر مون‘ دیکھا گیا۔

چاند کو زمین سے بے حد قریب اور معمول سے زیادہ روشن دیکھ کر سب حیران رہ گئے۔ حیران کر دینے والے اس منظر میں چاند کو زمین سے قریب اور مختلف رنگ میں دیکھا گیا۔

خیال رہے کہ ہر اسلامی ماہ کی چودہویں تاریخ کی شب میں چاند مکمل ہوتا ہے اور عام دنوں کے مقابلے میں زیادہ روشن ہوتا ہے۔

سائنسی اعتبار سے پورا چاند اس وقت ہوتا ہے جب چاند اور سورج ایک دوسرے کے مخالف ہوتے ہیں اور سورج کی روشنی چاند کے آمنے سامنے ہوتی ہے۔

تاہم سپر مون اس وقت ہوتا جب  پورا چاند زمین کے مدار سے بہت قریب آتا ہے، جس کے باعث وہ عام چاند سے زیادہ روشن اور زیادہ بڑا دکھائی دیتا ہے۔

یہ ایک حیرت انگیز قدرتی امر ہے کہ سپر مون عام چاند سے تقریباً 16 فیصد زیادہ چمکدار و روشن اور پورے چاند سے اوسط 6 فیصد بڑا دکھائی دیتا ہے۔

واضح رہے کہ ناسا کے ریٹائرڈ ماہر فلکیات کے مطابق  رواں برس  کا چوتھا اور آخری سپر مون آئند ہ ماہ اگست میں  دیکھا جاسکے گا۔اس سے قبل مئی اور جون میں بھی سپر مون ہوچکے ہیں۔

جولائی میں ہونے والے سپر مون کو  ’بک مون‘، ’تھنڈر مون ‘اور  ’ہے مون ‘بھی کہا جاتا ہے۔