غزہ پر اسرائیل کی بمباری دوسرے روز بھی جاری رہی جس کے نتیجے میں بچوں سمیت 24 فلسطینی شہید ہوگئے ہیں۔
غیر ملکی خبر رساں ادارے کے مطابق فلسطین کے شہر غزہ میں اسرائیل کے وحشیانہ فضائی حملے جاری ہیں جس کے نتیجے میں 24 فلسطینی شہید ہوگئے ہیں۔
حماس کے زیر انتظام علاقے میں محکمہ صحت کے حکام کا کہنا ہے کہ جمعہ سے جاری اسرائیلی جارحیت میں 6 فلسطینی بچے شہید ہوئے ہیں جبکہ 204 افراد زخمی ہیں۔
دوسری جانب اسرائیل نے بچوں کی ہلاکت کا ذمہ دار عسکریت پسند تنظیم اسلامک جہاد کو قرار دیا ہے، اس کا کہنا ہے کہ اسلامک جہاد کی جانب سے شمالی غزہ کے علاقے جبالیہ پر داغا گیا راکٹ متعدد بچوں کی ہلاکت کا ذمہ دار ہے۔
یہ بھی پڑھیں: اسرائیل کی غزہ پر وحشیانہ بمباری میں 10 فلسطینی شہید
اسرائیل نے ایک ہفتے تک اسلامک جہاد کے خلاف فضائی اور زمینی حملے جاری رکھنے کا اعلان کررکھا ہے۔
اسرائیل کا اس حوالے سے کہنا ہے کہ اسلامک جہاد کی جانب ممکنہ خطرے کے پیش نظر آپریشن کیا جارہا ہے کیونکہ اسلامک جہاد اسرائیل پر حملے کرنے کی منصوبہ بندی میں ملوث ہے۔
دوسری جانب مصر کے صدر جنرل عبدالفتح السیسی کشیدگی کو کم کرنے کے لیے کوشاں ہیں، ان کا کہنا ہے کہ وہ کشیدگی کو کم کرنے کے لیے فلسطینی اور اسرائیلی حکام سے مسلسل بات چیت کررہے ہیں۔
غزہ کے مقامی صحت حکام نے کشیدگی کے حوالے خبردار کرتے ہوئے اگلے چوبیس گھنٹے انتہائی مشکل اور اہم قرار دیے ہیں، اگلے 72 گھنٹوں میں بجلی کی کمی کی وجہ سے اہم سروسز معطل ہونے کا بھی خدشہ ہے۔
یہ بھی پڑھیں: اسرائیلی فوج کی فائرنگ سے 16 سالہ فلسطینی نوجوان شہید
غزہ میں بجلی کی تقسیم کار کمپنی کا کہنا ہے کہ ایندھن کی کمی کی وجہ سے واحد پاور اسٹیشن بند ہوچکا ہے۔
واضح رہے کہ گذشتہ شام عام شہریوں نے فضائی حملوں سے بچنے کے لیے محفوظ پناہ گاہوں کا رخ کیا۔ اسرائیلی حملے کے نتیجے میں خواتین اور بچے ملبے تلے پھنس کر رہ گئے ہیں۔
عینی شاہدین کے مطابق غزہ میں ہونے والے حملوں میں پانچ مکانات کو نشانہ بنایا گیا تھا جس کی وجہ سے غزہ شہر لرز اٹھا تھا، دھوئیں اور گرد کے بادل چھاجانے کے بعد کئی مکانات ملبہ کا ڈھیر بن گئے تھے۔
یاد رہے کہ اسرائیل نے اسلامک جہاد کے کمانڈر خالد منصور کو ہلاک کرنے کا دعویٰ کیا ہے تاہم اس کی حتمی تصدیق نہیں ہوسکی ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News