ترکیہ کے شہر استنبول میں اتوار کو بم دھماکہ ہوا جس کے نتیجے میں 6 افراد ہلاک اور 81 زخمی ہوگئے۔

ترکیہ کے وزیر داخلہ سلیمان سویلو کی جانب سے ایک بیان سامنے آیا ہے جس میں ان کا کہنا ہے کہ استنبول میں ہونے والے دھماکے کے الزام میں ایک مشتبہ شخص کو گرفتار کرلیا گیا ہے۔

انہوں نے کہا کہ ہماری تحقیقات کے مطابق استنبول بم دھماکے میں کردستان ورکرز پارٹی (پی کے کے) ملوث ہے۔

سرکاری نیوز ایجنسی کے مطابق کئی گھنٹے گزرنے کے بعد ترکیہ کے وزیر داخلہ نے مشتبہ حملہ آور کی گرفتاری کا اعلان کیا ہے۔

واضح رہے کہ پی کے کے 1980 کی دہائی سے جنوب مشرقی ترکی میں کردوں کی خود مختاری کے لیے پرتشدد کارروائیاں جاری رکھے ہوئے ہے جب کہ ترکیہ اور اس کے مغربی اتحادیوں نے اس جماعت کو دہشت گرد گروپ قرار دیا ہے۔

خیال رہے کہ ترکیہ کے شہر استنبول کی مصروف استقلال اسٹریٹ پر دھماکہ اتوار کی شام 4 بج کر 20 منٹ ہوا تھا جب کہ دھماکے کے بعد ہر طرف خوف و حراس اور لاشیں زمین پر پڑی دکھائی دی تھیں۔

ترکیہ کے صدر رجب طیب اردگان نے اس دھماکے کو گھناؤنا حملہ قرار دیا ہے، انہوں نے کہا کہ ہماری قوم کو اس بات کو یقینی بنانا چاہیے کہ استقلال اسٹریٹ پر ہونے والے واقعے کے مرتکب افراد کو سزا دی جائے جس کے وہ مستحق ہیں۔

یاد رہے کہ اتوار کو ہونے والا دھماکہ دسمبر 2016 کے بعد سب سے مہلک تھا جس کی ذمہ داری اب تک کسی گروپ نے قبول نہیں کی ہے۔

اس سے قبل ترکیہ میں ہونے والے دہشت گرد حملوں کی ذمہ داری القاعدہ، داعش اور کردستان ورکرز پارٹی قبول کرچکی ہے۔