قومی کھلاڑی احمد شہزاد نے چیمپئنز ون ڈے کپ کو فراڈ کپ قرار دیتے ہوئے چیف سلیکٹر محمد یوسف اور چیئرمین پی سی بی کو کڑی تنقید کا نشانہ بنایا ہے۔

احمد شہزاد نے یوٹیوب چینل پر گفتگو کرتے ہوئے فیصل آباد میں جاری چیمپئنز ون ڈے کپ کو فراڈ کپ قرار دیا اور ساتھ ہی ٹورنامنٹ کی ساکھ اور قومی اسکواڈ کے انتخاب کے عمل پر سوال اٹھایا۔

انہوں نے کہا کہ کامران غلام کو ایک بار پھر نظر انداز کیا گیا ہے اور چیف سلیکٹر محمد یوسف نے انہیں 15 رکنی قومی اسکواڈ میں بھی شامل نہیں کیا۔

چیمپئنز ون ڈے کپ میں دو سنچریاں اسکور کرنے والے کامران غلام کو نظر انداز کرنے پر احمد شہزاد نے چیئرمین پی سی بی محسن نقوی کو بھی تنقید کا نشانہ بنایا۔

قومی کرکٹر کہتے ہیں کہ یہ وہی ٹیم ہے جو ورلڈکپ میں مایوس کن کارکردگی کے بعد اگلے راؤنڈ میں بھی کوالیفائی نہیں کرسکی تھی۔

ان کا یہ بھی کہنا تھا کہ یہ وہی ٹیم ہے جس کو امریکہ جیسی ٹیم تک سے شکست کا سامنا کرنا پڑا اور تاریخ میں پہلی مرتبہ بنگلادیش نے پاکستان کو وائٹ واش کردیا۔

احمد شہزاد مزید کہتے ہیں کہ تمام ناکامیوں کے بعد ہم نے ٹیم میں سرجری کی باتیں سنیں اور کہا گیا تھا کہ اس فراڈ کپ میں شامل کھلاڑیوں کو پرفارمنس کی بنیاد میں قومی ٹیم میں شامل کیا جائے گا لیکن ہمیں ایسا دیکھنے کا نہیں ملا۔