شوبز انڈسٹری کی معروف اداکارہ کنزہ ہاشمی نے اپنے ڈرامہ ’لیڈر‘ میں سیاستدان کا کردار ادا کرنے کے بعد قومی اسبملی کا دورہ کیا جہاں ارکان پارلیمنٹ اور حکام نے ان کے کام کو سراہا۔
کنزہ ہاشمی نے ڈرامہ ’لیڈر‘ میں ایک بااثر سیاسی خاندان سے تعلق رکھنے والی ذہین اور مضبوط خاتون سیاستدان کا کردار نبھایا ہے۔ ان کے اس کردار کو ناظرین کی جانب سے پسند کیا گیا جبکہ بعض حقیقی سیاستدانوں نے بھی اداکارہ کی پرفارمنس کو سراہا۔
View this post on Instagram
رکن قومی اسمبلی رومینہ خورشید عالم کی دعوت پر کنزہ ہاشمی نے پارلیمنٹ ہاؤس کا دورہ کیا۔ اس موقع پر انہیں قومی اسمبلی کی عمارت، تاریخی اہمیت کی حامل اشیا، مختلف فن پاروں اور دیگر اہم مقامات کے بارے میں بریفنگ دی گئی۔
View this post on Instagram
اداکارہ نے قومی اسمبلی کے ایوان کا دورہ کرنے کے ساتھ ساتھ پارلیمنٹ کے عملے سے بھی ملاقات کی۔ بعد ازاں رومینہ خورشید عالم نے کنزا ہاشمی کو یادگاری تحفہ پیش کیا اور خواتین سیاستدانوں کے کردار اور پارلیمانی زندگی کو ڈرامے میں اجاگر کرنے پر ان کی کاوش کو سراہا۔
رومینہ خورشید عالم کا کہنا تھا کہ مجھے اس بات پر فخر ہے کہ کنزا ہاشمی نے میڈیا کے ذریعے خواتین سیاستدانوں کی جدوجہد اور کردار کو نمایاں کیا۔ اداکارہ کی کوشش قابلِ تعریف ہے۔
View this post on Instagram
کنزہ ہاشمی نے بھی قومی اسمبلی کے دورے کو اپنے لیے مفید تجربہ قرار دیتے ہوئے کہا کہ پارلیمنٹ کو قریب سے دیکھنے اور اس کے ماحول کو سمجھنے سے انہیں ڈرامہ ’لیڈر‘ میں ادا کیے گئے اپنے کردار کو مزید بہتر انداز میں سمجھنے میں مدد ملی۔
