اسٹیٹ بینک آف پاکستان نے ٹیکس دہندگان کی سہولت کے پیشِ نظر ملک بھر میں مخصوص کمرشل بینک برانچز کو آج اور کل کھلا رکھنے کا اعلان کر دیا ہے تاکہ سرکاری ڈیوٹیز اور ٹیکسز کی بروقت وصولی ممکن بنائی جاسکے۔
اسٹیٹ بینک کے ایکسٹرنل کمیونیکیشنز ڈیپارٹمنٹ کی جانب سے جاری اعلامیے کے مطابق یہ اقدام فیڈرل بورڈ آف ریونیو (ایف بی آر) کی درخواست پر اٹھایا گیا ہے۔
To facilitate taxpayers in making over-the-counter payment of Government duties and taxes, it has been decided that Saturday opening branches of all commercial banks shall remain open from 09:00 A.M. to 03:00 P.M. on Saturday & Sunday i.e. May 23 & 24, 2026. The banks shall also… pic.twitter.com/YKbSsfj3Pl
— SBP (@StateBank_Pak) May 22, 2026
اعلامیے کے مطابق تمام کمرشل بینکوں کی وہ برانچز جو معمول کے مطابق ہفتے کے روز کام کرتی ہیں جب کہ نیشنل بینک آف پاکستان کی کسٹمز کلیکشن سے متعلق برانچز بھی 23 اور 24 مئی 2026 کو صبح 9 بجے سے دوپہر 3 بجے تک کھلی رہیں گی۔
اسٹیٹ بینک نے بینکوں کو ہدایت جاری کی ہے کہ وہ اتوار 24 مئی کو این آئی ایف ٹی کے ذریعے سرکاری لین دین کی خصوصی کلیئرنگ مکمل ہونے تک متعلقہ برانچز کو فعال رکھیں۔
اس کے علاوہ ٹیکس دہندگان کی سہولت کے لیے انٹرنیٹ بینکنگ، موبائل ایپس، اے ٹی ایمز اور دیگر ڈیجیٹل ادائیگی کے ذرائع کی مسلسل دستیابی کو بھی یقینی بنانے کی ہدایت کی گئی ہے تاکہ آن لائن ٹیکس ادائیگی میں کسی قسم کی رکاوٹ پیش نہ آئے۔
