شہر قائد میں پولیس نے سڑک پر کچرا پھینکنے کے الزام میں دفعہ 144 کی خلاف ورزی کرنے والےایک شہری کو گرفتار کرلیا ہے جو کہ کھلے عام کچرا پھینک رہا تھا۔

تفصیلات کے مطابق کراچی میں سکھن تھانے کی حدود میں پولیس کو سڑک پر کچرا پھینکنے کی شہری کی جانب سے نشاندہی کی گئی جس پر فوری کارروائی کرتے ہوئے پولیس نے اس شخص کو گرفتار کرکے مقدمہ درج کرلیا ہے،شہری کے خلاف دفعہ 188 کے تحت کارروائی کی گئی جس میں شہری عبدالجبار کو گھر سے باہر سڑک پر کچرا پھینکنے اور دفعہ 144 کی خلاف ورزی پر گرفتار کیا گیا۔

محکمہ داخلہ سندھ نے شہر بھر میں دفعہ 144نافذ کرکے گھر میں مین گیٹ پر بھی کچرا پھینکنے اور پبلک مقامات پر پان تھوکنے پر مکمل پابندی عائد کی ہے جبکہ اس کے ساتھ ساتھ گاڑی سے کچرا سڑک پر پھینکنا بھی جرم ہوگا۔

محکمہ داخلہ سندھ  کی جا نب سے پرانی عمارتوں کا ملبہ روڈ پر پھینکنے، پبلک مقامات پر پان تھوکنے پر بھی پابندی عائد کا نوٹیفکیشن جاری کیا گیا ہے۔

واضح رہے کہ گزشتہ دن مشیر سندھ حکومت مرتضیٰ وہاب کا کہنا تھا کہ لوگوں کے تعاون سے کچرے کو صاف کر سکتے ہیں، ایک بار صفائی ہوجائے تو پھر روزمرہ کی صفائی کا خیال رکھا جائے گا، پیپلز پارٹی میدان میں اتر چکی ہے سارےکام کیے جائیں گے۔

مشیر سندھ حکومت مرتضیٰ وہاب کا مزید کہنا تھا کہ صفائی مہم سے پہلے کراچی سے روزانہ 11 ہزار ٹن کچرا اٹھایا جا رہا تھا، مہم کے بعداب روز 14 ہزار ٹن کچرا اٹھایا جا رہا ہے۔