کراچی کےعلاقےشادمان ٹائون میں کے ڈی اے فلیٹس سے دو افراد کی لاشیں ملیں ہیں جبکہ اسی مقام سے دو افرادزخمی بھی ملے۔

تفصیلات کےمطابق فلیٹ سے ملنے والےجاں بحق اور زخمی افرادکا تعلق ایک ہی خاندان سے ہے۔

اسپتال حکام کےمطابق جاں بحق افراد میں 40 سالہ کاشف اور8 سالہ زینب شامل ہیں،جاں بحق افرد باپ بیٹی ہیں جبکہ زخمیوں میں 35 سالہ ماں سوفیہ اور 10 سالہ آیان شامل ہیں۔

پولیس کے مطابق لاشوں اور زخمیوں کوعباسی شہیداسپتال منتقل کردیاگیا۔

ابتدائی تحقیقات سے معلوم ہوا ہے کہ کاشف نامی شخص نے بیوی بچوں پر ہتھوڑے سے تشدد کیا اور عمارت سے کود کر خود کشی کرلی۔ پولیس نےشبہ ظاہرکیا ہے کہ ہلاکتوں کی وجہ گھریلو جھگڑا ہے، جاں بحق کاشف کی بیوی اور بیٹے کی حالت بھی تشویش ناک ہے۔

ایڈیشنل پولیس سرجن ڈاکٹر سلیم کاکہناہے کہ جاں بحق ہونے والے کاشف کی لاش کا معائنہ مکمل کرلیاگیا، کاشف کے جسم پر متعدد فریکچرز جبکہ سر کی ہڈی بھی ٹوٹی ہوئی ہے۔

ڈاکٹرسلیم کاکہناہے کہ کاشف کی ہلاکت بلندی سے گرنے کے باعث ہوئی جبکہ اسپتال میں لیڈی ایم ایل او نہ ہونے کے باعث جاں بحق ہونے والی زینب کی لاش کا معائنہ نہیں ہوسکا،لاشیں اسپتال آئے ہوئے دو گھنٹے ہوگئے۔

پولیس کاکہناہے کہ ابتدائی طورپرواقعہ قتل اورخود کشی کا لگتاہے، کاشف نامی نوجوان نے کسی بھاری چیز سے بیوی اور بچوں کو زخمی کیااوربعد میں عمارت سے چھلانگ لگا کر خود کشی کر لی۔

پولیس کا کہناہے کہ واقعےکی تفتیش ابھی جاری ہے۔