بالی ووڈ کی معروف اداکارہ مادھوری ڈکشٹ نے خواتین کی اصل تصویر کشی دیکھ کر خوش کا اظہار کر دیا۔

غیر ملکی خبر رساں ادارے کے  مطابق مادھوری ڈکشٹ نے فلموں میں نظر آنے والےان نئے کرداروں کی تعریف کی ہے جن میں خواتین کو ’کسی ظلم کا بدلہ لینے والے فرشتے کے‘ طور پر یا پھر ’کسی ظلم وستم‘ کا شکار ہوتے نہیں دکھایا گیا۔

حالیہ انٹرویو میں اداکارہ نے اپنے خواتین کی اسکرین پر عکاسی کے بارے میں بات کی۔

اداکارہ نے دوارن انٹرویو کہا کہ میرے خیال میں اب مصنفین خواتین کے لیے بہتر اسکرپٹ، بہتر کردار لکھ رہے ہیں۔

انہوں نے کہا کہ اس سے پہلے، اگر آپ خواتین پر مبنی کچھ بھی اسکرین پر دکھاناچاہتے تھے، تو خواتین کو صرف ’کسی ظلم کابدلہ لینے والے فرشتے کے‘ طور پر یا پھر ’کسی ظلم وستم‘ کا شکار ہوتے ہی دکھایا جاتا تھا۔

اداکارہ نے مزید کہا کہ’آج خواتین کے لیے بہت اچھے کردار لکھے جا رہے ہیں جوکہ بہت مضبوط کردار ہیں۔

اداکارہ مادھوری نے بات جاری رکھتے ہوئے کہا کہ خواتین کامل نہیں ہیں، ان میں خامیاں بھی ہیں، اور یہی چیز ان کے کرداروں کو بہت خوبصورت بناتی ہے۔‘

اُنہوں نے کہا کہ ’لوگ صرف اسکرینز پر ان کرداروں سے محظوظ ہونے کے علاوہ ان میں خود کو بھی دیکھ سکتے ہیں۔‘

مادھوری ڈکشٹ نے اپنی بات کی وضاحت اپنی ہی ویب سیریز ’دی فیم گیم‘ کا حوالہ دیتے ہوئے دی کہ’اس سیریز میں جو کردار میں نے ادا کیا، وہ ایک شاندار کردار ہے کیونکہ وہ ایک ماں ہے، وہ ایک بیوی ہے، وہ ایک بیٹی ہے لیکن اس میں تھوڑی سی خامیاں بھی ہیں۔‘

اداکارہ نے واضح کیا کہ’عورت فرشتہ نہیں ہے، وہ ایک عورت ہے، وہ انسان ہے۔‘

اُنہوں نے اپنی بات مکمل کرتے ہوئے کہا کہ’اور آج کل کی تحریروں میں یہی بات اچھی ہے اور یہی وجہ ہے کہ خواتین کو بہت اچھے کردار مل رہے ہیں۔

اداکارہ نے بات کا اختتام کرتے ہوئے کہا کہ یہ فلموں میں خواتین کے لیے ایک سنہری دور ہے۔‘