پاکستانی اداکارہ سحر ہاشمی نے شہرت کے ساتھ آنے والے چیلنجز اور ایک فنکار کی ذاتی زندگی پر پڑنے والے اثرات کے بارے میں کھل کر اظہارِ خیال کیا ہے۔
ایک نجی پروگرام میں گفتگو کرتے ہوئے سحر ہاشمی نے کہا کہ بطور فنکار مشہور ہونے کے کئی نقصانات بھی ہوتے ہیں جن میں سب سے بڑا نقصان ذاتی زندگی کا متاثر ہونا ہے۔
اداکارہ کا کہنا تھا کہ جب لوگ آپ کو جاننے لگتے ہیں تو آپ کی نجی زندگی کسی حد تک محدود ہوجاتی ہے اور ہر عمل کو تنقیدی نظر سے دیکھا جاتا ہے۔
انہوں نے کہا کہ مجھے لگتا ہے کہ ایک فنکار کی ذاتی زندگی کافی حد تک کمپرو مائز ہو جاتی ہے۔ ہمارے لیے جیسے صحیح اور غلط کا معیار بھی زیادہ سخت ہوجاتا ہے۔
View this post on Instagram
سحر ہاشمی کے مطابق عام لوگوں کی طرح فنکاروں سے بھی غلطیاں ہو سکتی ہیں تاہم انہیں اکثر ایسی رعایت نہیں دی جاتی جو دوسروں کو مل جاتی ہے۔
انہوں نے کہا کہ اگر کسی فنکار سے کوئی غلطی ہوجائے تو فوراً تنقید شروع ہوجاتی ہے جبکہ لوگ یہ نہیں سوچتے کہ وہ بھی ایک انسان ہے اس کی اپنی پسند، ناپسند اور جذبات ہوتے ہیں۔
اداکارہ نے مزید کہا کہ فنکار فطری طور پر بہت حساس ہوتے ہیں لیکن اکثر لوگ ان کے جذبات اور نفسیاتی دباؤ کو سمجھنے کی کوشش نہیں کرتے۔
سحر ہاشمی کے اس بیان کو سوشل میڈیا صارفین کی جانب سے بھی توجہ حاصل ہو رہی ہے جہاں شہرت کی قیمت اور فنکاروں کی نجی زندگی سے متعلق بحث جاری ہے۔
