معروف ٹی وی میزبان ندا یاسر اپنے ایک حالیہ بیان کے باعث ایک بار پھر سوشل میڈیا پر صارفین کی توجہ کا مرکز بن گئی ہیں۔
اپنے مارننگ شو میں گفتگو کرتے ہوئے ندا یاسر نے والدین کو مشورہ دیا کہ وہ بچوں کو صرف جائیداد یا زیورات دینے کے بجائے انہیں خودمختار بنائیں اور زندگی کے عملی تجربات حاصل کرنے کے مواقع فراہم کریں۔
ندا یاسر کا کہنا تھا کہ ضرورت سے زیادہ حفاظتی رویہ بچوں کے اعتماد اور خود اعتمادی کو متاثر کر سکتا ہے۔ والدین کو چاہیے کہ بچوں کی ایسی تربیت کریں جس سے وہ نئے تجربات حاصل کریں، خود فیصلے کرنا سیکھیں اور عملی زندگی کے چیلنجز کا سامنا کرنے کے قابل بن سکیں۔
View this post on Instagram
انہوں نے مثال دیتے ہوئے کہا کہ والدین کو بچوں میں اتنا اعتماد پیدا کرنا چاہیے کہ وہ ضرورت پڑنے پر کراچی سے لاہور تک تنہا سفر بھی کر سکیں۔
ندا یاسر کے اس بیان کے بعد سوشل میڈیا پر مختلف آراء سامنے آئیں۔ بعض صارفین نے ان کی بات سے اتفاق کرتے ہوئے بچوں میں خودمختاری پیدا کرنے کی ضرورت پر زور دیا جبکہ متعدد صارفین کا کہنا تھا کہ پاکستان کی موجودہ امن و امان کی صورتحال کے پیش نظر کم عمر بچوں کو اکیلے سفر کرنے کا مشورہ مناسب نہیں۔
کئی صارفین نے یہ مؤقف بھی اختیار کیا کہ بچوں کی حفاظت والدین کی اولین ترجیح ہونی چاہیے، اس لیے اس حوالے سے حالات اور عمر کو مدنظر رکھتے ہوئے فیصلے کیے جانے چاہییں۔
