50 سال سے زیادہ عمر کے 5,520 افراد پر ہونے والی ایک تحقیق میں معلوم ہوا کہ پیٹ کے گرد زیادہ چربی اور وٹامن ڈی کی کمی ایک ساتھ موجود ہوں تو قبل از وقت موت کا خطرہ نمایاں طور پر بڑھ سکتا ہے۔

ایسے افراد جن میں صرف پیٹ کے گرد چربی جمع تھی ان میں موت کا خطرہ 47 فیصد زیادہ تھا جبکہ صرف وٹامن ڈی کی کمی رکھنے والے افراد میں یہ خطرہ 91 فیصد تک نوٹ کیا گیا تاہم دونوں مسائل ایک ساتھ ہونے پر خطرہ  123 فیصد زیادہ پایا گیا۔

محققین کے مطابق پیٹ کی اضافی چربی جسم میں سوزش بڑھا سکتی ہے، جبکہ موٹاپا خون میں دستیاب وٹامن ڈی کی مقدار اور اس کے استعمال کو بھی متاثر کر سکتا ہے۔ وٹامن ڈی کی کمی مدافعتی نظام، پٹھوں، دل اور میٹابولزم سمیت جسم کے کئی نظاموں پر اثر ڈال سکتی ہے۔

 عمر بڑھنے کے ساتھ کمر کے گرد اضافی چربی کو کم رکھنا، متوازن غذا لینا، جسمانی سرگرمی برقرار رکھنا اور وٹامن ڈی کی مناسب سطح کے بارے میں ڈاکٹر سے مشورہ کرنا صحت کے لیے فائدہ مند ہو سکتا ہے۔

 یہ تحقیق دونوں عوامل کے درمیان تعلق ظاہر کرتی ہے اس سے یہ ثابت نہیں ہوتا کہ وٹامن ڈی کی گولی لینے سے لازماً موت کا خطرہ 123 فیصد کم ہو جائے گا۔