لاہور میں وزیراعلیٰ آفس نے شہبازشریف کے دورحکومت کے مالی سال 18-2017 اور وزیراعلیٰ عثمان بزدار کے دور حکومت کے مالی سال  21-2020 کے اعداد و شمار کا موازنہ جاری کر دیا ہے۔

تفصیلات کے مطابق شہباز شریف کے دور حکومت کا آخری مالی سال میں وزیراعلیٰ آفس کے اخراجات میں قومی وسائل کا بے دریغ استعمال کیا گیا تھا۔

شہبازشریف کے دور میں مالی سال 18-2017 میں وزیراعلیٰ آفس کے مجموعی اخراجات (نان سیلری) 23 کروڑ 86 لاکھ روپے تھے جبکہ وزیراعلیٰ عثمان بزدار کے دور میں (نان سیلری) 14 کروڑ 41 لاکھ روپے رہے ہیں۔

جاری کردہ رپورٹ کے مطابق شہباز شریف کے دور میں مالی سال 18- 2017 میں گاڑیوں کی مرمت پر 4 کروڑ 24 لاکھ روپے کے اخراجات ہوئے تھے جبکہ عثمان بزدار کے دور میں ایک کروڑ50 لاکھ روپے خرچ ہوئے ہیں۔

وزیراعلیٰ عثمان بزدار کے دور میں گاڑیوں کی مرمت کی مد میں شہبازشریف کے دور کے مقابلے میں 65 فیصد کمی ہوئی ہے۔

وہیں دوسری جانب وزیراعلی پنجاب عثمان بزدار کہتے ہیں کہ وزیراعلیٰ آفس سمیت پنجاب بھر میں شوبازوں کی شاہ خرچیوں کا کلچرختم کردیا ہے ، ماضی کی حکومت نے سرکاری خزانے کو مال مفت کی طرح اڑایا ہے۔

انہوں نے مزید کہا کہ ہم قومی وسائل کی پائی پائی کے امین ہیں ، عوام کے وسائل پر سب سے پہلے حق عوام کا ہے۔

سکیورٹی کے نام پر ذاتی رہائش گاہوں کی تعمیر و مرمت کا سلسلہ بھی ختم کر دیا گیا ہے۔