وزیراعلیٰ پنجاب سردار عثمان بزدار نے عوام کی شکایات اور فرائض سے غفلت برتنے پر سخت ایکشن لے لیا ہے۔

تفصیلات کے مطابق ڈیرہ غازی خان میں 6 افسران جن میں ڈائریکٹر انٹی کرپشن ڈی جی خان حافظ احمد طارق ، ایکسین ہائی وے ڈی جی خان گلفام اقبال، ایم ایس ٹیچنگ ہسپتال ڈی جی خان ڈاکٹر اطہر فاروق ، جیل سپریٹنڈنٹ سنٹرل جیل ڈی جی خان یاسر خان ، ایڈیشنل ڈپٹی کمشنر ریوینو مظفرگڑھ عمران شمس سمیت تحصیلدار ڈی جی خان آفتاب اقبال  کو عہدوں سے ہٹا دیا گیا ہے۔

عثمان بزدار کا کہنا ہے کہ عوامی مسائل کا بروقت ازالہ نہ کرنے والے افسروں کے لئے پنجاب میں کوئی جگہ نہیں ہے ، بہت نرمی کرکے دیکھ  لی ہے اب افسروں کو افسر شاہی چھوڑ کر عوامی خدمت کرنا ہو گی۔

ان کا مزید کہنا تھا کہ جہاں کوتاہی یا غفلت نظر آئی بغیر وقت ضائع کئے ایکشن ہو گا، شہروں کے وزٹ اور عوام کے فیڈ بیک  سے  زمینی حقائق کا علم ہوتا ہے۔

وزیراعلی پنجاب نے یہ بھی کہا کہ پنجاب میں جو افسر ڈلیور کرے گا وہ ہی عہدے پر رہے گا ، سرکاری فرائض میں کوتاہی قطعا برداشت نہیں کی جائے گی۔

واضح رہے کہ عثمان بزدار نے افسران کو وارننگ دیتے ہوئے کہا کہ   عوام کے مسائل حل نہ کرنے والے افسران اپنا قبلہ درست کرلیں۔