وزیر داخلہ شیخ رشید احمد  نے کہا ہے کہ فلپائنی شہریوں کو پاکستان پہنچنے میں ہر ممکن مدد دیں گے۔

تفصیلات کے مطابق  وزیر داخلہ شیخ رشید احمد سے فلپائن کے سفیر ڈینیئل راموس ایسپیریٹو کی ملاقات ہوئی جس میں دو طرفہ تعلقات سمیت باہمی دلچسپی کے امور پر بات چیت کی گئی جبکہ افغانستان میں پھنسے سو سے زائد فلپائن کے شہریوں کے انخلاء سے متعلق تبادلہ خیال کیا گیا۔

اس موقع پر وزیر داخلہ شیخ رشید احمد  نے کہا کہ افغانستان میں تبدیل ہوتی صورت حال کے پیش نظر اپنی انسانی اور سفارتی ذمہ داریاں پوری کر رہے ہیں  جبکہ غیر ملکی شہریوں کو  افغانستان سے بحفاظت نکلنے میں بھر پور مدد کر رہے ہیں۔

 شیخ رشید احمد نے کہا کہ سفارت کاروں، صحافیوں ، بین الاقوامی تنظیموں کے عہدیداروں اور ان کے اہل خانہ کے لئے ویزا پالیسی نرمی کی ہے۔

وزیر داخلہ شیخ رشید احمد  نے مزید کہا کہ وزیر اعظم پاکستان کی ہدایت پر ان کو پاکستان آمد پر ویزے کی سہولت فراہم کر رہے ہیں جبکہ خصوصی فلائٹس کی اجازت دے رہے ہیں اور سکیورٹی  بھی فراہم کررہے ہیں۔

ملاقات میں  فلپائن کے سفیر ڈینیئل راموس ایسپیریٹو نے  پاکستان کے جذبہ خیر سگالی کی تعریف کی۔

فلپائنی سفیر نے کہا کہ خواہش ہے فلپائنی شہر یوں کو جلد از جلد بحفاظت افغانستان سے نکالیں جس پر وزیر داخلہ نے سفیر کو یقین دہانی کرواتے ہوئے کہا  کہ فلپائنی شہریوں کو پاکستان پہنچنے میں ہر ممکن مدد دیں گے۔