سی سی پی او غلام محمود ڈوگر نے کہا ہے کہ غنڈہ عناصر اور شرپسند عناصر لاہور چھوڑ دیں۔
تفصیلات کے مطابق سی سی پی او غلام محمود ڈوگر نے کھلی کچہری کے سائلین سے خطاب کرتے ہوئے کہا کہ کھلی کچہریوں کا اہتمام سائلین کو بروقت انصاف کی فراہمی کے پیش نظر کیا گیا ہے۔
غلام محمود ڈوگر کا کہنا تھا کہ لاہور کے تاریخی مقام سے ایک بار پھر کھلی کچہریوں کا آغاز کیا گیا، اس سے قبل بھی وقتاً فوقتاً کھلی کچہریوں کا انعقاد کیا جاتا رہا، سائلین کی درخواستوں پر فوری احکامات صادر کئے جائیں گے، غنڈہ عناصر اور شرپسند عناصر لاہور چھوڑ دیں۔
سی سی پی او لاہور غلام محمود ڈوگر نے کہا کہ شریف شہریوں کیلئے وبال جان بننے والوں کو لاہور پولیس جینے نہیں دے گی، گزشتہ رات سے غنڈہ عناصر کے خلاف ایک آگاہی مہم کا بھی آغاز کیا گیا ہے۔
سی سی پی او کا کہنا تھا کہ لاہور میں کوئی کسی کی اراضی پر قبضہ نہ کرے، اب پولیس عوامی مسائل کے حل کے لئے خود شہریوں کی دہلیز پر ہوگی۔
غلام محمود ڈوگر نے کہا کہ کھلی کچہریوں کا مقصد شہریوں کے مسائل کو ترجیحی بنیادوں پر حل کرنا ہے، کھلی کچہری موصول ہونے والی درخواستوں کو فوری نمٹا جائے گا، کھلی کچہریوں کے انعقاد سے پولیس افسران و عوام الناس میں خلاء ختم ہوگا۔
سی سی پی او لاہور غلام محمود ڈوگر کے خطاب کے دوران ایک خاتون چیک لین دین کے معاملے میں کھلی کچہری میں درخواست لیکر پہنچ گئی۔
سی سی پی او لاہور غلام محمود ڈوگر نے خاتون کی درخواست پر عمل کرتے ہوئے ٹریفک وارڈن عمران کو معطل کر دیا اور خاتون کی رقم واپس کرنے کیلئے 2 دن کی مہلت دے دی۔
سی سی پی او لاہور نے 2 خواتین کی درخواستوں پر فوری عمل کرتے ہوئے ایس پی سٹی کو مقدمہ درج کر کے فوری کارروائی کا حکم دے دیا۔
واضح رہے کہ اس موقع پر ڈی آئی جی انوسٹیگیشن شارق جمال سمیت دیگر افسران بھی موجود تھے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News