سال 2021 اپنی تمام تر تلخ اور شیریں یادوں کے ساتھ رخصت ہونے کو ہے۔ 2020 کی طرح رواں سال بھی دنیا بھر میں کلائمیٹ چینج ( آب و ہوا میں تبدیلی) ، اور قدرتی آفات کا سلسلہ جاری رہا۔

فلاحی تنظیم کرسچین ایڈ کے حالیہ رپورٹ کے مطابق 2021  میں آںے والے ہلاکت خیز قدرتی آفات کی وجہ سے دنیا بھر میں بھاری نقصان کے ساتھ 120 ارب پاؤنڈ سے زائد کا مالی نقصان بھی ہوا۔

ان اعداد و شمار سے ظاہر ہوتا ہے کہ یہ چھٹا سال ہے جس میں قدرتی نقصانات سے ہونے والا مالی نقصان 100 ارب ڈالر سے تجاوز کرگیا۔

رپورٹ کے مطابق اصل میں ہونے والا جانی اور مالی نقصان بیان کیے گئے اعداد و شمار سے کئی گنا زیادہ ہے۔

سال 2021 میں آنے والی 5 تباہ کن قدرتی آفات

1۔       طوفان ایدا

امریکا اور کیربئین جزائر میں 26 اگست کو آنے والے چوتھے درجے کے سمندری طوفان ایدا

دس دن تک اپنی تباہ کاریوں کا سلسلہ جاری رکھا۔ اسے 2005 میں آنے والے طوفان قطرینا کے بعد آنے والا دوسرا تباہ کن طوفان قرار دیا گیا۔  اس طوفان کے نتیجے میں امریکا کی متعدد جنوبی ریاستوں کو اپنا نشانہ بنایا۔

ایدا کی وجہ سے امریکا میں 95 افراد ہلاک ہوئے۔ محتاط اندازے کے مطابق ایدا کی وجہ سے امریکا کو 49 ارب پاؤنڈ نقصان کا سامنا کرنا پڑا۔

2۔       یورپیئن فلڈز

رواں سال جولائی میں ماحولیاتی تبدیلیوں کے نتیجے میں متعدد یورپی ممالک میں شدید ترین بارشوں کو سلسلہ شروع ہوا جس نے دیکھتے ہی دیکھتے سیلاب کی شکل اختیار کرلی۔

برطانیہ سے شروع ہونے والے سیلاب نے آسٹریا، بلیجیئم، کروشیا، جرمنی، اٹلی، لیکسمبرگ، نیدر لینڈ اور سوئٹزر لینڈ کو بھی اپنی لپیٹ میں لے لیا۔

یورپ کی تاریخ کے بدترین سیلاب نے مجموعی طور پر کم از کم 242 افراد کو موت سے ہم کنار کردیا۔ مرنے والوں میں 196 کا تعلق جرمنی، بلیجئم 142، رومانیہ 2، 1 اٹلی اور ایک کا تعلق آسٹریا سے تھا۔

اس سیلاب کے نتیجے میں 33 ارب پاؤنڈ کا مالی نقصان ہوا۔

3۔       ٹیکساس کا برفانی طوفان

 امریکی ریاست ٹیکساس میں 13 فروری کو آنے والے برفانی طوفان نے نظام زندگی کو درہم برہم کردیا۔ اس طوفان کے نتیجے میں بیس سال بعد امریکا کو سب سے بڑے بلیک آؤٹ کا سامنا کرنا پڑا۔

ہیوسٹن میں درجہ حرارت تاریخ کی کم ترین سطح مائنس 11 ڈگری پر پہنچ گیا۔ میکسیکو شہر میں برف باری نے سارے ریکارڈ توڑ دیے جب کہ اس طوفان کی وجہ سے چلنے والی تیز ہواؤوں کے بگولوں نے فلوریڈا میں بھی تباہی مچا دی۔

محض 4 دن رہنے والے اس طوفان نے 17ارب 20 کروڑ پاؤنڈ کا نقصان کردیا۔

 4۔       ہینان کا سیلاب

چین کے صوبے ہینان میں 17 جولائی کو آنے والے بدترین سیلاب نے 8 لاکھ افراد کو بے گھر کردیا، جب کہ اس سیلاب سے 14 ملین سے زاید افراد متاثر ہوئے۔

ہینان سیلاب سے سب سے زیادہ متاثر ہوا جب کہ اس سیلاب نے شانژی اور ہیوبے کو بھی جز وی نقصان پہنچایا۔

اس سیلاب کے نتیجے میں 302 افراد ہلاک ہوئے اور نقصانات کا تخمینہ 13 ارب 30 کروڑ پاؤنڈ لگایا گیا۔

5۔       برٹش کولمبیا سیلاب

کینیڈا میں ہونے والی موسلا دھار بارشوں کے نتیجے میں آنے والے سیلاب نے کینیڈا کے مغربی صوبے برٹش کولمبیا میں تباہی پھیلادی۔ دریاؤوں کے بپھرنے کی وجہ سے پل اور گھر بہہ گئے۔ اس قدرتی آفت کے نتیجے میں 5 ارب 60 کروڑ پاؤنڈ کا نقصان ہوا۔

کرسچن ایڈ کی رپورٹ میں بتایا گیا ہے کہ رپورٹ شہریوں کی جانب سے انشورینس کلیم کی بنیاد پر مرتب کی گئی ہے۔ جب کہ غریب اور ترقی پذیر ممالک میں اس نوعیت کی قدرتی آفات سےقیمتی انسانی جانوں کا ضیاع بہت زیادہ ہوتا ہے۔

جیسا کہ جنوبی سوڈان میں آنے والے سیلاب کی نتیجے میں ساڑھے 8 لاکھ افراد بے گھر ہوگئے لیکن حکومت کی جانب سے سے ہونے والے مالی نقصان کی کوئی فہرست مرتب نہیں کی گئی۔