دعوت ہو یا شادی کی تقریب خواتین کی تیاری میک اپ کے بغیر ادھوری ہے یہی وجہ ہے کہ موجودہ دور میں میک اپ خواتین کو حسین بنانے میں اہم کردارادا کررہا ہے۔ اسی میں مسکارا بھی شامل ہے۔

چہرے پر کتنا ہی میک اپ کر لیا جائے اگر پلکوں پر مسکارا نہ لگایا جائے تو یہ تیاری نہ مکمل رہتی ہے۔ مسکارا لگانے سے پلکیں گھنی اور خوبصورت نظر آتی ہیں اس طرح آنکھوں کا حسن مزید بڑھ جاتا ہے۔

دیکھا گیا ہے کہ اکثر خواتین مسکارے کے استعمال میں چند غلطیاں کرتی ہیں جو مستقبل میں ان کے لئے نقصان کا باعث بن سکتی ہیں۔ یہاں پر ان غلطیوں کے بارے میں آگاہ کیا جارہا ہے۔

پرانا مسکارا استعمال نہ کریں

اکثر خواتین پرانا مسکارا استعمال کر رہی ہوتی ہیں جو خراب ہوچکا ہوتا ہے اس طرح یہ پلکوں پر جم جاتا ہے اس طرح پلکیں کمزور ہوکر ٹوٹنے لگتی ہیں کوشش کریں مسکارا سمیت آنکھوں کے تمام میک اپ کو ہر چھ ماہ بعد تبدیل کر لیں تاکہ یہ آنکھوں کے لئے نقصان کا باعث نہ بنیں۔

مسکارا لگانے سے پہلے پلکوں کو کرل کریں

اگر پلکیں نیچے کی جانب جھکی ہوں گی تو آپ کو اپنی عمر سے بڑا ظاہر کریں گی تو ہمیشہ مسکارا لگانے سے قبل پلکوں کو ٹول کی مدد سے کرل کریں پھر اس پر مسکارا لگائیں اس طرح اوپر کی جانب اٹھی ہوئی پلکوں سے آنکھیں مزید حسین نظر آئیں گی۔

سونے سے قبل مسکارا ضرور صاف کریں

خواتین کی بڑی تعداد میک اپ تو صاف کر لیتی ہیں لیکن مسکارا کو ہٹانا بھول جاتی ہیں اوریہ رات بھر پلکوں پر رہنے کی وجہ سے پلکوں اور آنکھوں کی جلد کو متاثر کرسکتا ہے اس طرح آنکھوں کے گرد سیاہ حلقے اور جھریاں نمودار ہو سکتی ہیں تو کوشش کریں کہ سونے سے قبل مسکارے کو اچھی طرح صاف کریں۔