مصر کی حکومت نے بیوی کی اجازت کے بغیر دوسری شادی کرنے   پر قید کی سزا دینے کا فیصلہ کرلیا ہے۔

غیر ملکی میڈیا رپورٹ کے مطابق  مصر کی حکومت نے بیوی کی اجازت کے بغیر دوسری شادی کرنے  کی پابندی عائد کرنے کی تیاری شروع کردی ہے۔

مصر کی کابینہ نے  قانون سازی کرکے شادی بیاہ، طلاق، خلع، فسخ نکاح، شادی کی اہلیت، متولی، نان نفقہ، پرورش اور منگنی کے نئے قواعد و ضوابط مقرر  کیے ہیں۔

نئے قوانین کے مطابق  بیوی کی اجازت کے بغیر شادی کرنے والے  شخص کو ایک سال قید اور جرمانہ یا پھر دونوں سزائیں دی جائیں‌ گی۔

نئے قانون کے  مسودے میں لکھا گیا ہے کہ منگنی کے بعد نکاح سے انکار اور دونوں میں سے کسی ایک کی وفات کی صورت میں حق مہر کی مقرر کردہ رقم واپس کردی جائے گی۔

اگر کوئی شخص دوسری شادی کرے گا تو نکاح کے وقت  اسے پہلی بیوی کی طرف سے دوسری شادی کا اجازت نامہ پیش کرنا ہوگا۔

نئے قانون میں یہ بھی کہا گیا ہے کہ  اگر نکاح خواں نے شادی مخفی ہونے کے باوجود نکاح پڑھایا تو اُس کو بھی قید اور جرمانے کی سزا دی جائے گی۔

قانون کے مطابق   مادی یا معنوی نقصان پہنچنے کی صورت میں عورت کو طلاق یا خلع لینے کا حق حاصل ہوگا۔

نئے قانون میں  شادی کے لیے لڑکے اور لڑکی کی کم سے کم عمر 18 سال ہوگی، اس سے کم عمر افراد کی شادی کرانے والے افراد کو ایک سال قید اور پچاس سے دو لاکھ مصری پاؤنڈ جرمانہ ادا کرنا ہوگا۔

نئے قانون کی ایک قابل ذکر بات یہ ہے  مصر میں پیدا ہونے والے ہر بچے کا نسب ماں سے منسوب ہوگا۔