امریکا سے ایک دلچسپ خبر آئی ہے کہ دو سر والے ایک عجیب الخلقت سانپ کو بچالیا گیا ہے۔

اس سانپ کا نام ٹائیگر للی ہے جو ویسٹرن ریٹ اسنیک کی نسل سے تعلق رکھتا ہے۔ سرجری کے ذریعےمادہ سانپ کی بیضہ دانی (اووری) نکالی گئی ہے جو خون کی قے کی وجہ بن رہی تھی۔

میسوری میں واقع، پاؤڈر ویلی نیچر سینٹر کے ماہرین نے اس کی سرجری کی ہے۔ اس سےقبل اسے ماحول میں چھوڑنے کے انتظامات مکمل ہوچکے تھے۔ ماہرین نے غور کیا کہ کھانے کے بعد سانپ خون تھوک رہا ہے اور ایک تشویشناک حالت میں تھا۔ اس لیے اس کی جان کو خطرہ تھا اور سرجری کی گئی۔

آپریشن کے لیے سینٹ لوئی چڑیا گھر کی ماہرین کی ایک ٹیم نے بھی معاونت کی۔ سانپ کو بچانے کے لیے ماہرین نے تمام مصروفیات ترک کردی اور اسے بچانے میں منہمک ہوگئے۔

معلوم ہوا کہ مادہ سانپ کے بیضے شدید خرابی کے شکار تھے جسے پری اوولٹوری اسٹاسس کہا جاتا ہے۔ یعنی یہ انڈے دینے کی بجائے اس کے ریشے تیزی سے بڑھ رہے تھے۔ اس سے شدید انفیکشن بھی پیدا ہوگیا تھا۔

ماہرین نے اس کے بیضے نکال دیئے ہیں لیکن اب بھی ٹائیگر للی کو نگرانی میں رکھا گیا ہے۔