اسلام آباد: پاکستان نے مشرقِ وسطیٰ میں حالیہ پیش رفت اور بڑھتی ہوئی کشیدگی پر گہری تشویش کا اظہار کرتے ہوئے تمام فریقوں پر تحمل اور بردباری کا مظاہرہ کرنے پر زور دیا ہے۔

ترجمان دفتر خارجہ کے مطابق خطے میں رونما ہونے والے حالیہ واقعات کشیدگی میں مزید اضافے کا باعث بن رہے ہیں جس سے علاقائی امن و استحکام کو خطرات لاحق ہو سکتے ہیں۔

ترجمان نے کہا کہ پاکستان برادر ممالک کی خودمختاری اور علاقائی سالمیت کی مکمل حمایت کا اعادہ کرتا ہے اور تمام فریقوں سے مطالبہ کرتا ہے کہ وہ کشیدگی میں فوری کمی کے لیے عملی اقدامات کریں۔

انہوں نے کہا کہ مفاہمتی یادداشت کے تحت کیے گئے وعدوں کی پاسداری ناگزیر ہے اور تمام متعلقہ فریقوں کو اپنے عہد و پیمان پر قائم رہنا چاہیے۔

ترجمان دفتر خارجہ نے مزید کہا کہ پاکستان خطے میں پائیدار اور دیرپا امن کے لیے مذاکرات اور سفارت کاری کو ہی مؤثر راستہ سمجھتا ہے اور اسی مقصد کے حصول کے لیے ہر ممکن تعاون جاری رکھنے کے عزم پر قائم ہے۔