پاکستان کرکٹ بورڈ (پی سی بی) نے بنگلہ دیش کرکٹ بورڈ ( بی سی بی ) کی جانب سے پاکستان کے دورے پر واحد ٹیسٹ میچ پر اصرار کو ناقابل عمل تجویز  قرار دے دیا۔

تفصیلات کے مطابق  ذرائع پاکستان کرکٹ بورڈ( پی سی بی)  کا کہنا ہے کہ   ایک ٹیسٹ میچ پر اصرار کو ناقابل عمل تجویز  اس وجہ سے قرار دیا ہے کہ آئی سی سی ورلڈ ٹیسٹ چیمپئن شپ کا حصہ بننے کے لیے کم از کم دو ٹیسٹ میچوں کی سیریز لازمی ہے۔

ذرائع کا کہنا ہے کہ اگر بنگلہ دیش کرکٹ بورڈ پاکستان میں ایک ٹیسٹ میچ کھیلنے پر آمادگی ظاہر کرتا ہے تو یہ واحد ٹیسٹ آئی سی سی ورلڈ ٹیسٹ چیمپئن شپ کے لیے کوالیفائی نہیں کر سکے گا ۔

اس طرح مطلوبہ پوائنٹس کے حصول کی خاطر بنگلہ دیش کو پاکستان کے دورے پر دو ٹیسٹ میچوں کی سیریز کھیلنے پر ہی رضامندی ظاہر کرنا ہوگی جو کہ ورلڈ ٹیسٹ چیمپئن شپ کے حوالے سے کسی سیریز کے کم از کم میچوں کی حد ہے۔

پی ایس ایل کے ٹکٹوں کی قیمت مقرر کردی گئی؟

واضح رہے کہ بنگلہ دیشی کرکٹ بورڈ کی ہٹ دھرمی کے سبب اس بات پر بھی سوالیہ نشان لگ گیا ہے کہ بنگالی پلیئرز پاکستان سپر لیگ کے پانچویں ایڈیشن میں شرکت کرسکیں گے یا نہیں ۔

گذشتہ روز بنگلہ دیش کرکٹ بورڈکے صدر نظم الحسن نے اس پہلو کو ایک جانب رکھ دیا کہ بنگلہ دیشی پلیئر زپی ایس ایل فائیو  کے لیے پاکستان جانے پر تیار ہیں۔

ان کا کہنا تھا کہ وہ پی سی بی سے اپنے کھلاڑیوں کی شرکت سے متعلق استفسار کر چکے  ہیں جس پر انہیں یہ جواب دیا گیا کہ محض ناموں کی رجسٹریشن اس بات کی ضمانت نہیں کہ وہ پاکستان سپر لیگ میں کھیلیں گے ۔

انہوں نے کہا کہ پہلے انہیں مختلف فرنچائز اپنے اسکواڈز  کے لیےمنتخب کریں گی جس کے بعد ان سے این او سی طلب  کیےجائیں گے اور یہ عمل خاصا طویل ہے۔