سابق آل راؤنڈر عبدالرزاق نے پاکستان کرکٹ بورڈ (پی سی بی) سے علیحدگی اختیار کر لی ہے۔
ذرائع کے مطابق سابق ٹیسٹ کرکٹر نے پی سی بی کے کوچنگ اسٹاف سے استعفیٰ دے دیا ہے، عبدالرزاق ڈھائی سال تک پی سی بی کی کوچنگ اسٹاف کا حصہ رہے۔
سابق آل راؤنڈر نے ایک سال تک خیبرپختونخوا کی کوچنگ کی جب کہ گزشتہ سیزن میں عبدالرزاق کو سینٹرل پنجاب کا ہیڈ کوچ مقرر کیا گیا تھا تاہم عبدالرزاق تنقید کی زد میں رہے۔
پاکستان جونیئر لیگ (پی جے ایل) میں حیدر آباد کی ٹیم کے ساتھ اپنے فرائض سرانجام دینے والے عبدالرزاق کے خلاف سلیکشن کے معاملے میں کئی اعتراضات اٹھائے گئے تھے جب کہ پی جے ایل میں فرائض کی انجام دہی کے بعد انہوں نے سینٹرل پنچاب کی ٹیم کو دوبارہ جوائن نہیں کیا۔
عبدالرزاق پاکستان جونیئر لیگ کی ٹیم حیدرآباد کے ہیڈ کوچ تھے۔ مصباح الحق اور وقار یونس کے استعفیٰ دینے کے بعد عبدالرزاق کو نیوزی لینڈ کے خلاف سیریز کے لیے عبوری بولنگ کوچ بھی مقرر کیا گیا تھا۔
پی سی بی ذرائع نے عبدالرزاق کے استعفے کی تصدیق کرتے ہوئے واضح کیا ہے کہ انہوں نے مختلف نجی چینلز میں مصروفیات کے باعث استعفیٰ دیا ہے۔
واضح رہے کہ پی سی بی کی میڈیا پالیسی کے مطابق بورڈ کا کوئی بھی ملازم میڈیا میں کام نہیں کر سکتا ہے جب کہ عبدالرزاق میڈیا میں کام کرنے پر آمادہ تھے جس کی وجہ سے انہوں نے استعفیٰ دے دیا۔
عبدالرزاق نے قومی ٹیم کی نمائندگی کرتے ہوئے 46 ٹیسٹ، 265 ون ڈے انٹرنیشنل اور 32 ٹی ٹوئنٹی انٹرنیشنل میچز کھیلے ہیں۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News