پاکستان کرکٹ بورڈ (پی سی بی) مینجمنٹ کمیٹی کے چیئرمین ذکاء اشرف سری لنکا کی دعوت پر کولمبو روانہ ہوگئے ہیں۔

ذکاء اشرف سری لنکن کرکٹ بورڈ کے صدر موہن ڈی سلوا کی دعوت پر جمعہ اور ہفتہ کی درمیانی شب کولمبو کے لیے روانہ ہوئے ہیں، جہاں ان کی قومی کھلاڑیوں سے ملاقات متوقع ہے۔

ایشیاکپ 2023 کا آغاز پاکستان کی میزبانی میں 30 اگست سے ملتان میں ہونے جارہا ہے جب کہ ایشیاکپ کے میچز 31 اگست سے سری لنکا میں بھی کھیلے جائیں گے، اسی سلسلے میں ذکاء اشرف سری لنکا کا دورہ کررہے ہیں۔

چیئرمین پی سی بی سری لنکا میں قیام کے دوران نہ صرف ایشیاکپ 2023 کی تیاریوں کی نگرانی کریں گے بلکہ وہ اہم ملاقاتیں بھی کریں گے۔

میڈیا رپورٹس کے مطابق پی سی بی کے چیئرمین ٹیسٹ کرکٹ کھیلنے والے ممالک کے ساتھ پاکستان کے تعلقات کو مضبوط بنانے کے لیے سرگرم ہیں اور سلسلے میں وہ ملاقاتوں کا سلسلہ جاری رکھیں گے۔

سری لنکا کرکٹ نے انہیں اتوار کو ہونے والے لنکا پریمیئر لیگ 2023 کے فائنل شو ڈاؤن کا مشاہدہ کرنے کی دعوت دی ہے۔

واضح رہے کہ پاکستان کرکٹ ٹیم افغانستان کے خلاف سیریز کے لیے ان دنوں سری لنکا میں موجود ہے جب کہ پاک افغان پہلا ون ڈے 22 اگست کو ہمبنٹونا میں کھیلا جائے گا۔

ذکاء اشرف کی انتظامی ذمہ داریوں کے علاوہ قومی کھلاڑیوں سے ملاقات بھی متوقع ہے جس میں خاص طور پر سینٹرل کنٹریکٹس کو لے کر بات کی جائے گی۔

خیال رہے کہ قومی کھلاڑی تنخواہ میں اضافے سے مطمئن دکھائی دیتے ہیں جب کہ بعض مسائل پر بات چیت جاری ہے لیکن توقع ہے کہ سینٹرل کنٹریکٹس کا اعلان مستقبل قریب میں کردیا جائے گا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں