پی ایس ایل سیزن 11 میں اسلام آباد یونائیٹڈ اور پشاور زلمی کے درمیان کھیلا جانے والا اہم میچ بارش کے باعث منسوخ کر دیا گیا۔
تفصیلات کے مطابق لاہور میں ہونے والی تیز بارش نے آؤٹ فیلڈ کو مکمل طور پر گیلا کر دیا، جس کے باعث گراؤنڈ کھیل کے قابل نہ رہا۔ بارش رکنے کے باوجود میدان میں پانی جمع رہا اور متعدد بار معائنے کے باوجود میچ شروع نہ ہو سکا۔
میچ کا ٹاس بھی بار بار تاخیر کا شکار رہا، جبکہ انتظامیہ کی جانب سے کٹ آف ٹائم رات 9 بج کر 45 منٹ مقرر کیا گیا تھا۔
رات 8 بجے سے اوورز میں کمی کا عمل بھی شروع کر دیا گیا تھا تاکہ کسی صورت میچ ممکن بنایا جا سکے تاہم خراب آؤٹ فیلڈ کے باعث تمام کوششیں ناکام ہو گئیں۔
گراؤنڈ اسٹاف نے پانی خشک کرنے کے لیے بھرپور اقدامات کیے مگر مسلسل نمی اور پانی کے باعث کھیل ممکن نہ رہا۔
میچ منسوخ ہونے کے بعد دونوں ٹیموں کو ایک، ایک پوائنٹ دے دیا گیا، جس سے پوائنٹس ٹیبل پر بھی اثر پڑنے کا امکان ہے۔
