آسٹریلیا کے فاسٹ بولر مچل اسٹارک نے بنگلادیش کے خلاف دوسرے ٹیسٹ میں 10 وکٹیں حاصل کرنے کے بعد پہلی مرتبہ کیریئر میں آئی سی سی ٹیسٹ بولنگ رینکنگ میں پہلی پوزیشن حاصل کرلی۔
مچل اسٹارک نے بھارتی فاسٹ بولر جسپریت بمرا سے نمبر ایک پوزیشن چھین لی جب کہ پاکستان کے علی عثمان اور عبداللہ شفیق سمیت دیگر کھلاڑیوں کی رینکنگ میں بھی نمایاں بہتری ہوئی ہے۔
مچل اسٹارک نے بنگلادیش کے خلاف دوسرے ٹیسٹ میں 10 وکٹیں حاصل کیں جس کے بعد وہ دو درجے ترقی کرکے ٹیسٹ بولرز کی رینکنگ میں پہلے نمبر پر پہنچ گئے۔
Breathing fire every time he takes the ball 🔥
Mitchell Starc ascends to No.1 in the ICC Men’s Test Bowling Rankings 🔝
More ➡️ https://t.co/fvecGLHkbT pic.twitter.com/SvjlhKaFEk
— ICC (@ICC) August 26, 2026
جسپریت بمرا ایک درجے تنزلی کے بعد دوسرے نمبر پر آگئے جب کہ اسٹارک اور بمرا کے درمیان 10 ریٹنگ پوائنٹس کا فرق ہے۔
جسپریت بمرا کی نمبر ایک پوزیشن پر تازہ حکمرانی صرف دو ماہ برقرار رہی تاہم وہ مجموعی طور پر 697 دن ٹیسٹ کے نمبر ایک بولر رہ چکے ہیں۔
آسٹریلیا کے پیٹ کمنز بھی ایک درجے ترقی کرکے چوتھے نمبر پر پہنچ گئے جب کہ نیتھن لیون دو درجے بہتری کے ساتھ دسویں نمبر پر آگئے۔
انگلینڈ کے اولی رابنسن نے 15 درجے ترقی کرکے ٹیسٹ بولنگ رینکنگ میں 11 ویں پوزیشن حاصل کرلی، انہوں نے پاکستان کے خلاف پہلے ٹیسٹ میں 8 وکٹیں حاصل کی تھیں۔
انگلینڈ کے جوش ٹنگ 16 درجے ترقی کے بعد 17 ویں نمبر پر پہنچ گئے جب کہ بھارت کے مانَو سوتھر 28 درجے بہتری کے ساتھ کیریئر کی بہترین 48 ویں پوزیشن پر آگئے۔
پاکستان کے علی عثمان نے 30 درجے ترقی کرکے ٹیسٹ بولنگ رینکنگ میں 67 ویں پوزیشن حاصل کرلی جب کہ عبداللہ شفیق 7 درجے بہتری کے بعد مشترکہ طور پر 27 ویں نمبر پر آگئے۔
ٹیسٹ بیٹنگ رینکنگ میں ہیری بروک کی برتری برقرار
آئی سی سی ٹیسٹ بیٹنگ رینکنگ میں انگلینڈ کے ہیری بروک نے پہلی پوزیشن پر اپنی گرفت مزید مضبوط کرلی ہے اور جو روٹ پر اپنی برتری 24 ریٹنگ پوائنٹس تک بڑھالی ہے۔
بھارت کے رشبھ پنت ایک سال بعد دوبارہ ٹاپ 10 میں شامل ہوگئے، وہ 6 درجے ترقی کرکے ساتویں نمبر پر پہنچ گئے ہیں۔
بھارت کے کے ایل راہول 5 درجے ترقی کے بعد 30 ویں نمبر پر آگئے جب کہ آسٹریلیا کے کیمرون گرین 9 درجے بہتری کے ساتھ 21 ویں پوزیشن پر پہنچ گئے۔
سری لنکا کے سونال دنوشا نے 49 درجے کی بڑی چھلانگ لگاتے ہوئے ٹیسٹ بیٹنگ رینکنگ میں 54 ویں پوزیشن حاصل کرلی۔
