پنجاب کے کئی علاقے آج بھی دھند کی لپیٹ میں ہیں۔

تفصیلات کے مطابق وسطی اورجنوبی پنجاب کے کئی علاقے دھند کی لپیٹ میں ہیں جس کے سبب ٹریفک کی روانی متاثر ہے اور ٹھنڈ میں بھی مزید اضافہ ہوگیا ہے۔

محکمہ مو سمیات کے مطابق شیخوپورہ شہر اور گردونواح میں بھی شدید دھند ہے جس کی وجہ سے سردی کی شدت میں اضافہ ہو گیا ہے ۔

کراچی میں سردی کی لہر برقرار

پولیس پڑولنگ ذرائع کے مطابق شکر گڑھ شہر اور گردونواح میں دھند کی وجہ سے حدنگاہ انتہائی کم رہ گئی۔

 نارووال روڈ پر کرتا رپور سے جسڑ تک شدید دھند ہے جس سے حد نگاہ 20 میٹررہ گئی ہے۔

ترجمان موٹروےپولیس عمران احمدکے مطابق چیچہ وطنی،کسوال،اقبال نگر، میاں چنوں، خانیوال، ملتان، بستی ملوک میں بھی دھند شدید ہے جس سے قومی شاہراہ پرحد نگاہ 30 میٹر تک ہے۔

واضح رہے کہ ملک کے بیشترعلاقوں میں موسم سرد اور خشک جبکہ بالائی پنجاب، بالائی خیبرپختونخوا، گلگت بلتستان اور کشمیر میں مطلع ابر آلود رہے گا۔

شمال مشرقی پنجاب میں بعض مقامات پر بونداباندی کا امکان ہے تاہم دیگرمیدانی علاقوں میں صبح اور رات کے اوقا ت میں دھند پڑنے کا امکان ہے۔

گزشتہ چوبیس گھنٹوں کے دوران ملک کے بیشتر علاقوں میں موسم سرد اور خشک رہا۔

سب سے زیادہ سردی اسکردومیں پڑی جہاں کا درجہ حرارت منفی 15 ڈگری سینٹی گریڈ ریکارڈ کیا گیا۔