محکمہ موسمیات نے شہر قائد میں آج کی موسم کی صورتحال سے آگاہ کردیا ہے۔

محکمہ موسمیات کے مطابق شہر قائد میں سمندری ہوائیں معطل ہیں اور آج سے گرمی کی شدت میں اضافہ متوقع ہے۔

محکمہ موسمیات کا کہنا ہے کہ شہر کا آج زیادہ سے زیادہ درجہ حرارت 37 تا 38 ڈگری سینٹی گریڈ ریکارڈ ہونے کا امکان ہے جبکہ کم سے کم درجہ حرارت 25.5 ڈگری سینٹی گریڈ ریکارڈ رہے گا۔

اس کے علاوہ شہر میں گرمی کی شدت 40 ڈگری سینٹی گریڈ تک ریکارڈ ہونے کا امکان ہے جبکہ ہوا میں نمی کا تناسب 59 فیصد ریکارڈ کیا گیا۔

محکمہ موسمیات کے مطابق بلوچستان میں آج سے گرج چمک کے ساتھ بارشوں کا امکان ہے جبکہ کراچی میں آج رات یا کل صبح سے بارش کا سلسلہ شروع ہوگا۔

شہر قائد میں بارش سے متعلق محکمہ موسمیات نے مزید بتایا کہ شہر میں گرج چمک کے ساتھ بارش کا امکان ہے جبکہ چند مقامات پر موسلادھار بارش ہوسکتی ہے، تاہم شہر میں 19 اپریل تک بارشوں کا سلسلہ جاری رہے گا۔

واضح رہے کہ محکمہ موسمیات نے آندھی اور گرج چمک کے ساتھ بارشوں کے نئے سلسلے کی پیشگوئی کی اور کہا کہ رواں ہفتے کے دوران ملک کے مختلف حصوں میں آندھی، جھکڑ چلنے اور گرج چمک کے ساتھ مزید بارشوں کا امکان ہے۔

   بارشوں سے ندی نالوں میں طغیانی، پہاڑی علاقوں میں لینڈ سلائیڈنگ جبکہ کمزور انفراسٹرکچر کو نقصان پہنچنے کا خدشہ ہے۔

اس حوالے سے متعلقہ اداروں کے لیے الرٹ جاری کرتے ہوئے شہریوں کو محتاط رہنے کا مشورہ دیا گیا ہے۔