بھارت میں دولہا والوں کی جانب سے سستا لہنگا بھیجنے کے بعد دلہن نے رخصتی سے انکار کردیا۔

بھارتی میڈیا کے مطابق ریاست اترکھنڈ کے شہر ہلدوانی میں ایک عجیب واقعہ پیش آیا، جہاں دلہن نے صرف اس بات پر رخصتی سے انکار کردیا کہ دولہا والوں نے سستا لہنگا بھیجا ہے۔

رپورٹ کے مطابق لہنگے کی قیمت 10 ہزار روپے تھی جو دولہے کے والد نے خریدا تھا جب کہ دلہن کو کم قیمت اور خراب معیار کی وجہ سے لہنگا پسند نہیں آیا۔

رپورٹ میں کہا گیا ہے کہ جوڑے کی شادی رواں ماہ 5 نومبر کو ہونا تھی جب کہ ان کی منگنی رواں سال جون میں ہوئی تھی۔

بھارتی میڈٰیا کے مطابق دونوں خاندانوں میں معاملہ بڑھتا گیا جس کے بعد پولیس سے رابطہ کیا گیا جب کہ پولیس نے دونوں خاندانوں کو مطمئن کرکے گھر بھیج دیا۔

بعد ازاں دولہا والوں نے دوبارہ مسئلہ اٹھایا کہ ہمارے شادی کے کارڈ چھپ چکے ہیں، دوبارہ پولیس کی مداخلت سے صلح ہوئی اور شادی منسوخ کرنے کا فیصلہ کیا گیا۔

واضح رہے کہ برصغیر میں شادی کی تقریبات میں فضول خرچی کوئی غیر معمولی بات نہیں، کھانا ہو یا رسومات ہر چیز میں پیسہ پانی کی طرح بہایا جاتا ہے۔

شادی کی تقریبات میں صرف امیر ہی نہیں بلکہ متوسط طبقے کے لوگ بھی نمودو نمائش کرتے ہیں۔