راولپنڈی: باجوڑ آپریشن میں شہید میجر عادل زمان کی نمازِ جنازہ پشاور گیریژن میں ادا کردی گئی جس میں آرمی چیف فیلڈ مارشل عاصم منیر نے بھی شرکت کی۔
پاک فوج کے شعبہ تعلقات عامہ (آئی ایس پی آر) کے مطابق باجوڑ میں فتنہ الخوارج کے خلاف جاری آپریشن کے دوران شہید ہونے والے پاک فوج کے افسر میجر عادل زمان شہید کی نمازِ جنازہ پشاور گیریژن میں ادا کردی گئی۔
آئی ایس پی آر نے بتایا کہ نمازِ جنازہ میں فیلڈ مارشل سید عاصم منیر، وفاقی وزیر داخلہ، کور کمانڈر پشاور سمیت اعلیٰ عسکری اور سول حکام نے شرکت کی۔ اس موقع پر فیلڈ مارشل سید عاصم منیر نے میجر عادل زمان شہید کی عظیم قربانی کو خراجِ عقیدت پیش کیا۔
اس موقع پر آرمی چیف نے کہا کہ پاکستان آرمی کے شہداء پوری قوم کا فخر ہیں اور ان کی قربانیاں ہمیشہ یاد رکھی جائیں گی۔ انہوں نے اس عزم کا اعادہ کیا کہ دہشت گردی کے مکمل خاتمے تک پاک فوج کی جدوجہد جاری رہے گی۔
ترجمان پاک فوج کا کہنا ہے کہ میجر عادل زمان شہید نے دشمن کے خلاف فرنٹ لائن سے قیادت کرتے ہوئے جامِ شہادت نوش کیا اور وطن کے دفاع میں جان کا نذرانہ پیش کیا۔ شہید افسر کو مکمل فوجی اعزاز کے ساتھ ان کے آبائی شہر ڈیرہ اسماعیل خان میں سپردِ خاک کیا جائے گا۔
آئی ایس پی آر کا کہنا ہے کہ شہداء کی قربانیاں پاکستان مسلح افواج کے عزم اور حوصلے کو مزید مضبوط کرتی ہیں جب کہ دہشت گرد عناصر کے خلاف کارروائیاں پوری قوت کے ساتھ جاری رہیں گی۔
دریں اثنا فیلڈ مارشل سید عاصم منیر نے سی ایم ایچ پشاور کا دورہ بھی کیا، جہاں انہوں نے آپریشن کے دوران زخمی ہونے والے افسران اور جوانوں کی عیادت کی اور ان کے حوصلے کو سراہا۔
