ماسکو: روس کے دارالحکومت ماسکو میں پہلی بار روبوٹس کی علامتی شادی کی تقریب منعقد کی گئی جس کی تصاویر اور ویڈیوز سوشل میڈیا پر تیزی سے گردش کررہی ہیں اور صارفین کی توجہ حاصل کررہی ہیں۔
یہ منفرد تقریب ماسکو کی ایک لائبریری میں منعقد ہوئی، جہاں رابرٹ اور میٹلڈا نامی دو روبوٹس کو علامتی طور پر میاں بیوی قرار دیا گیا۔ تقریب میں موجود شرکاء نے اس منفرد لمحے کو خوب سراہا۔
سوشل میڈیا پر سامنے آنے والی ویڈیوز میں دونوں روبوٹس کو موسیقی کی دھن پر رقص کرتے ہوئے بھی دیکھا جاسکتا ہے جب کہ تقریب کے دوران انہیں شادی کی مناسبت سے ویڈنگ بریسلیٹس بھی پہنائے گئے۔
View this post on Instagram
رپورٹس کے مطابق رابرٹ کو ایک آفس ورکر اور بلاگر کے انداز میں تیار کیا گیا ہے جب کہ میٹلڈا کو بیلرینا کی شکل دی گئی ہے جو اس تقریب کی توجہ کا مرکز بنی رہی۔
روبوٹس کی اس منفرد اور دلچسپ تقریب کی ویڈیوز اور تصاویر سوشل میڈیا پر وائرل ہونے کے بعد صارفین کی جانب سے مختلف تبصرے اور دلچسپ ردعمل بھی سامنے آرہے ہیں۔
