اسلام آبادہائیکورٹ نےجج ویڈیواسکینڈل کیس میں نوازشریف کی متفرق درخواست قابل سماعت قراردےدی۔

تفصیلات کے مطابق اسلام آباد کی عدالت عالیہ  نے جج ویڈیواسکینڈل کیس میں نوازشریف کی متفرق درخواست قابل سماعت قراردےدی ہے۔ اپیل کی سماعت کا تحریری حکم نامہ بھی جاری کر دیا گیا ہے۔

 جسٹس عامر فاروق اورجسٹس محسن اخترکیانی نے تحریری حکم جاری کیا۔

عدالت نےکہانوازشریف نےاپیل کےدوران اضافی شواہدکاجائزہ لینے کی درخواست کی۔جج ویڈیواسکینڈل کےحوالےسےنوازشریف کی متفرق درخواست قابل سماعت قرار ہے۔

عدالت نے تحریری حکم میں نیب کو نوٹس جاری کرتے ہوئے 14 روز میں جواب جمع کرانے کی ہدایت کر دی۔

 عدالت نے کہا کیس کی پیپر بکس کی تیاری ہو چکی۔ فریقین نے کاپیاں حاصل کرلیں۔ کیس مزید 2 ہفتے کے بعد سماعت کے لیے مقرر کیا جائے۔

واضح رہے کہ 6 جولائی 2019 کو پاکستان مسلم لیگ کی اعلیٰ قیادت نے پریس کانفرنس میں سابق وزیراعظم نواز شریف کو سزا سنانے والے احتساب عدالت کے جج ارشد ملک کی ایک ویڈیو جاری کی جس میں مبینہ طور پر یہ بتایا گیا کہ احتساب عدالت کے جج ارشد ملک کو نواز شریف کو سزا سنانے کے لیے بلیک میل کیا گیا۔ اس بنیاد پر مریم نواز نے یہ مطالبہ کیا کہ چونکہ جج نے خود اعتراف کرلیا ہے لہٰذا نواز شریف کو سنائی جانے والی سزا کو کالعدم قرار دے کر انہیں رہا کیا جائے۔

تاہم جج ارشد ملک نے ویڈیو جاری ہونے کے بعد اگلے روزایک پریس ریلیزکےذریعے اپنے اوپرعائد الزامات کی تردید کی اورمریم نواز کی جانب سے دکھائی جانے والی ویڈیو کو جعلی۔ فرضی اور جھوٹی قرار دیا۔