کراچی میں ڈینگی  بخار سے اموات میں اچانک تیزی،ڈینگی نے مزید 4 زندگیاں نگل لیں۔

تفصیلات کے مطابق شہر قائد میں ڈینگی بے قابو ہوگیا ہے، ڈینگی  بخار نے مزید 4 افراد کی جان لے لی۔نجی اسپتال نے اموت کی تصدیق کردی۔

ڈینگی بخار سے جاں بحق ہونےو الوں میں گلبہار کی رہائشی 57 سالہ گلنار بیگم ،نارتھ کراچی کی 50 سالہ سعیدہ خاتون ،نجی اسپتال میں  زیر علاج ڈیفنس کے رہائشی 82 سالہ سرفراز حسین اور گلبہار کی رہائشی 35 سالہ افشاں آصف شامل ہیں۔

حالیہ اموات کے بعد ڈینگی سے اموات کی تعداد 26 ہوگئی ہے۔

سندھ ڈینگی کنٹرول پروگرام کی رپورٹ کے مطابق سندھ بھر میں گزشتہ چوبیس گھنٹوں کے دوران 247 افراد ڈینگی کا شکار ہوئے ہیں۔

کراچی میں گزشتہ چوبیس گھنٹوں کے دوران 225 افراد ڈینگی سے متاثر ہوئے جبکہ سندھ کے دیگر اضلاع سے گزشتہ چوبیس گھنٹوں میں 22 افراد ڈینگی سے متاثر ہوئے۔

ماہ اکتوبر میں ڈینگی کے سندھ بھر سے 5490 کیس رپورٹ ہوئے جس میں 5137 کا تعلق کراچی سے ہے۔

رواں سال سندھ بھر میں اب تک ڈینگی کے 8707 کیس رپورٹ ہوچکے ہیں۔رواں سال کراچی سے ڈینگی کے اب تک 8181 کیس رپورٹ ہوچکے ہیں۔

رواں سال سندھ کے دیگر اضلاع سے اب تک ڈینگی کے 526 کیس رپورٹ ہوئے ہیں۔