وفاقی وزیر داخلہ شیخ رشید احمد نے پنڈی میں میڈیا سے بات چیت کرتے ہوئے کہا ہے کہ25 جولائی کو کشمیر میں عمران خان کی حکومت بننے جارہی ہے۔

شیخ رشید کا کہنا تھا کہ وزیر اعظم عمران خان نے ابسولوٹلی ناٹ دلیری سے کہا ہے کہ دنیا میں کشمیر کا مسئلہ لڑینگے ، پاکستان پرکوئی دباؤ نہیں ہے ہم غیرت مند قوم ہیں جبکہ دنیا کی کوئی بھی طاقت پاکستان کو نظر انداز نہیں کر سکتی ہے۔

ان کا کہنا تھا کہ ہماری پوری کوشش ہے کہ چمن اور طورخم بارڈر سے پاکستانی جلد واپس آئیں جبکہ چمن اور طورخم بارڈر کھلے رہیں گے ،  کوشش ہے کہ ویکسی نیشن کروانے والوں کو بارڈر کراس کروادیں۔

ان کا مزید کہنا تھا کہ پاکستان کی فوج اور پاکستان تحریک انصاف صرف قومی جماعتیں ہیں ،  اشرف غنی ، عبداللہ  سمیت سب مل بیٹھیں گے،  50 سال سے وہاں جنگ لڑی جا رہی ہے۔

ان کا کہنا تھا کہ افغانستان میں ایک نیا طالبان پیدا ہو چکا ہے ، ان سے بات چیت کرنا بہت ضروری ہے۔

میڈیا سے بات چیت کے دوران انہوں نے یہ بھی کہا کہ ہندوستان کو افغانستان میں جگ ہنسائی ہوئی ہے ، 1979 سے اب تک پاکستان کے خلاف دہشت گردی کو بھارت نے منظم کیا ہے۔

شیخ رشید کا کہنا تھا کہ ہماری فوج کے ساتھ گمنام سپاہیوں کو  پوری قوم سلام کرتی ہے ،   ساری دنیا کو کہتے ہیں افغانستان میں امن کی بات کرینگے جبکہ پاکستان کی قوم بھی چاہتی ہے کہ کسی کے آلہ کار نہ بنے۔

واضح رہے کہ وفاقی وزیر شیخ رشید نے مریم نواز پر تنقید کرتے ہوئے کہا کہ مریم نواز جو زبان استعمال کر رہی ہیں وہ قابل اعتراض ہے جبکہ بلاول دل کا جانی ہے اسکی سی وی میرے پاس ہے۔

کشمیر میں کسی ڈبے سے بلے کے علاوہ ووٹ نہیں نہیں نکلے گا۔