قومی ٹیم کے کپتان بابر اعظم کا کہنا ہے کہ آج کی جیت پوری ٹیم کی مشترکہ محنت کا نتیجہ ہے۔

تفصیلات کے مطابق قومی ٹیم کے کپتان بابر اعظم نے میڈیا سے گفتگو کرتے ہوئے بتایا ہے کہ جب بھی جیت ملتی ہے بطور کپتان بہت اعتماد ملتا ہے ، تمام کھلاڑیوں نے شاندار کھیل پیش کیا ہے۔

ان کا کہنا تھا کہ وکٹ سے مدد نہیں ملی تو فیلڈنگ پوزیشنز بدل کر حریف ٹیم پر دباؤ بڑھانے کا فیصلہ کیا تھا، خوشی ہے کہ پہلی اننگز میں جلدی وکٹیں گنوانے کے باوجود فواد عالم کے ساتھ پارٹنرشپ ہمیں میچ میں واپس لائی۔

بابر اعظم کا کہنا تھا کہ شاہین شاہ آفریدی نے شاندار باولنگ کا مظاہرہ کیا ہے ، میں ہمیشہ کہتا ہوں فواد عالم بہت تجربہ کار بیٹسمین ہیں۔

ان کا کہنا تھا کہ مشکل کنڈیشنز میں فواد عالم نے شاندار بیٹنگ کا مظاہرہ کیا ہے ، ڈومیسٹک کرکٹ میں 10 ہزار رنز بنانے والے فواد عالم ٹیم کو مشکل صورتحال سے نکالنے میں اہم کردار ادا کررہے ہیں۔

انہوں نے یہ بھی کہا کہ ہمارے ہر بیٹسمین کو فواد عالم سے سیکھنے کی ضرورت ہے۔

بابر اعظم کا مزید کہنا تھا کہ شاہین شاہ آفریدی بہت بااعتماد باولر ہیں اور خوشی ہے کہ شاہین شاہ آفریدی جیسا باولر میرے پاس ہے۔