کلونجی میں کولیسٹرول، سر درد اور آنتوں کی بیماریوں سمیت دیگر کئی بیماریوں کا علاج موجود ہے اس کی اہمیت اس بات سے واضح ہے کہ کلونجی کھانا سنت بھی ہے۔

حضور اکرم ﷺکاارشاد ہے ”کلونجی استعمال کیا کرو کیونکہ اس میں موت کے سوا ہر بیماری کیلئے شفا ہے” اس حدیث سے ہی کلونجی کی اہمیت واضح ہو جاتی ہے۔

کلونجی کے استعمال سے کون کون سی بیماریوں کا خاتمہ ہو سکتا آیئے جانتے ہیں۔

کلونجی کے حیرت انگیز فوائد

ماہرین کے مطابق کلونجی دماغی کمزوری کو دور کرتی ہے، فالج کے مریض کے لئے کلونجی کے تیل کا استعمال مفید ہے، اس کو روزانہ صبح نہار منہ کھانے سے انسان بےشمار بیماریوں سے محفوظ رہتا ہے۔

زچہ خواتین کے لئے مفید

ایسی خواتین جنہیں بچے کی پیدائش کے بعد دودھ کم آتا ہو اور بچے کی بھوک مٹانے سے قاصر ہوں ایسی خواتین کلونجی سے بہتر کچھ نہیں اس کے لئے کلونجی کے چھ سات دانے صبح نہار منہ اور رات سونے سے قبل دودھ کے ساتھ استعمال کریں اس سے ان کے دودھ کی مقدارمیں اضافہ ہو جائے گا، البتہ حاملہ خواتین کلونجی کا استعمال کرنے سے گریز کریں۔

نظامِ ہاضمہ کے لئے مفید

کلونجی میں ایساغذائی ریشہ پایا جاتا ہے جو نظامِ ہاضمہ کو بہتر بناتا ہے، اس کے استعمال سے کھانا کھانے کے بعد پیٹ میں بھاری پن یا گیس کی شکایت نہیں ہوتی یہ معدے کے لئے بھی مفید ہوتی ہے کلونجی کو سر کے کے ساتھ ملا کراگر بچے کو کھلایا جائے تو پیٹ کے کیڑے مر جاتے ہیں۔

سردی زکام میں مفید

نزلہ، زکام اور کھانسی سردی میں ایک عام مسئلہ ہے مگر اس سے نجات کے لئے بھی کلونجی کا استعمال کیا جا سکتا ہے، اس کے لئے کلونجی کو بھون کر باریک پیس لیں اور کپڑے کی پوٹلی بنا کر بار بار سونگھیں اس سے زکام دور ہو جاتا ہے۔

گردے اور مثانے کے امراض

کلونجی گردوں اور مثانے کے جملہ امراض کو دور کرنے کے لئے بےحد فائدے مند ہے کلونجی پیشاب آور بھی ہے، اس کا جوشاندہ شہد میں ملا کر پینے سے گردے اور مثانے کی پتھری ختم ہو جاتی ہے۔

رنگت نکھارنے کے لئے بہترین

کلونجی خوبصورتی میں اضافے کے لئے بھی استعمال کی جا سکتی ہے، چہرے کی رنگت میں نکھار اور جلد صاف کرنے کے لئے کلونجی کو باریک پیس کر گھی میں ملا کر چہرے پر لیپ کرنے سے رنگت میں نکھار آتا ہے، اور کلونجی کے تیل سے چہرے کا مساج کرنے سے داغ دھبے اور دانے ختم ہوتے ہیں اور رنگ سرخ و سفید ہو جائے گا۔