چودہویں ساؤتھ ایشین گیمز کے انعقاد کی راہ ہموار ہوگئی ساؤتھ ایشیا اولمپک کونسل کی ایگزیکٹو کمیٹی نے گیمز کے شیڈول اور میزبانی سے متعلق اہم انتظامی امور کی منظوری دے دی۔
اسلام آباد میں ہونے والے ساؤتھ ایشیا اولمپک کونسل کی ایگزیکٹو کمیٹی کے اجلاس میں فیصلہ کیا گیا کہ چودہویں ساؤتھ ایشین گیمز آئندہ سال 3 سے 11 اپریل تک پاکستان میں منعقد ہوں گے۔
اجلاس کی صدارت پاکستان اولمپک ایسوسی ایشن کے صدر عارف سعید نے کی، جبکہ سری لنکا، بنگلا دیش، نیپال، بھوٹان اور مالدیپ کے نمائندوں نے اجلاس میں شرکت کی۔
بھارتی وفد نے اجلاس میں ویڈیو لنک کے ذریعے شرکت کی، جبکہ پاکستان اولمپک ایسوسی ایشن کے سیکریٹری جنرل خالد محمود اور وزارت بین الصوبائی رابطہ کے حکام بھی اجلاس میں موجود تھے۔
اجلاس کے دوران پاکستان میں چودہویں ساؤتھ ایشین گیمز کے انعقاد سے متعلق مختلف انتظامی معاملات کا جائزہ لیا گیا اور اہم امور کی منظوری دی گئی۔
گیمز کی تاریخوں کی باضابطہ منظوری کے بعد پاکستان میں خطے کے اہم کثیرالملکی کھیلوں کے مقابلوں کی میزبانی کی تیاریوں کا باقاعدہ مرحلہ مزید آگے بڑھ گیا ہے۔
