امریکی صدر ڈونلڈ ٹرمپ کی بیٹی ایوانکا ٹرمپ نے اپنے والد کے ساتھ مزید کام کرنے سے انکار کردیا ہے۔

غیر ملکی خبر رساں ادارے کے مطابق ایک غیر ملکی ٹی وی چینل کو انٹرویو دیتے ہوئے امریکی صدر ڈونلڈ ٹرمپ کی صاحبزادی ایوانکا ٹرمپ نے کہا ہے کہ اگر ان کے والد دوبارہ امریکا کے صدر منتخب ہوئے تو وہ ان کے ساتھ کام نہیں کریں گی۔

ایوانکا نے کہا اگر اُن کے والد 2020 میں صدر منتخب ہو بھی گئے تو وہ ان کے ساتھ کام نہیں کریں گی۔ گو ان کے اس فیصلے میں لچک رہے گی تاہم ان کے بچے اور ان کی خوشیاں پہلے ہیں اورمستقبل میں بھی یہی ان کی اولین ترجیح ہوگی۔

ڈونلڈ ٹرمپ کی بیٹی کا کہنا تھا کہ سیاست میں میرا رجحان کم ہے۔ میرے لیے لوگوں کی زندگیوں کو بہتر بنانا اور پالیسیاں ہی اہم رہی ہیں۔

ڈونلڈ ٹرمپ کے مواخذے کی قرارداد منظور

واضح رہے کہ امریکی صدر کی بیٹی ایوانکا ٹرمپ اس وقت وائٹ ہاؤس کی مشیر کے طور پر کام کر رہی ہیں۔

ایوانکا کے شوہر جیراڈ کشنر کو  بھی ڈونلڈ ٹرمپ نے صدارت کا منصب سنبھالنے کے بعد اپنا سینئر مشیر مقرر کیا تھا۔

ایوانکا اور ان کے شوہر اپنے بچوں کے ہمراہ نیویارک میں مقیم تھے تاہم سرکاری عہدہ ملنے کے بعد دونوں 2017 میں واشنگٹن منتقل ہوگئے تھے۔

لبرل ذہن کے حامل اس جوڑے کی ٹرمپ انتظامیہ میں موجود قدامت پسند اراکین سے مبینہ محاذ آرائی رہی ہے، تاہم ایوانکا اس تناؤ سے انکار کرتی رہی ہیں البتہ ان کا کہنا تھا کہ میرے بچے اور ان کی خوشیاں پہلے ہیں اور یہی میری اولین ترجیح ہوگی۔

یاد رہے کہ ایوانکا ،ڈونلڈ ٹرمپ کی پہلی بیوی ایوانا ٹرمپ سے ان کی دوسری بیٹی ہیں۔

ایوانکا جنہیں ’یائل کشنر‘ کے نام سے بھی جانا جاتا ہےایک بزنس وومن، فیشن ڈیزائنر، مصنف اور  ریئلٹی ٹی وی اسٹار بھی ہیں۔