بھارتی جوڑے نے کورونا وائرس کی پابندیوں کے بعد اپنے ملک کی پہلی ’میٹاروس‘ شادی کی تیاریاں شروع کردی ہیں۔

غیر ملکی خبر رساں ادارے کے مطابق بھارت میں شادی یا کسی بھی عوامی اجتماع میں 100 لوگوں کو شرکت کی اجازت دے رکھی ہے لیکن ایک بھارتی جوڑے نے اپنی شادی کی تقریب میں زیادہ لوگوں کو مدعو کرنے کے لیے اس کا بھی حل تلاش کرلیا ہے۔

 بھارتی ریاست تامل ناڈو سے تعلق رکھنے والے دنیش شو کمار پدماواتی اور ان کی ہونے والی بیوی جنگنندنی رامسوامی نے اگلے ماہ اپنی شادی کی ورچوئل تقریب میں 2 ہزار لوگوں کو مدعو کیا ہے۔

اس جوڑی نے ہیری پورٹر کے پرستار کے طور پر اپنے خود ساختہ پوٹر ہیڈز تیار کرواکے ’ہاگ وارٹس تھیم پارٹی‘ کا اہتمام کیا ہے جس میں مہمان اپنے موبائل فون، ٹیبلیٹ یا لیپ ٹاپ کے ذریعے شرکت کریں گے۔

            رپورٹ کے مطابق دنیش شو کمار نے مہمانوں کو فون پر دعوت دیتے کہا کہ ’میٹاورس‘ پارٹی کا اہتمام بھارت میں کورونا کے پھیلاؤ کی موجودہ صورت حال کے پیش نظر کیا گیا ہے۔

دوسری جانب شادی کی حقیقی تقریب تامل ناڈو کے ضلع کرشناگری میں منعقد کی جائے گی جس میں صرف قریبی دوست اور رشتہ دار ہی شرکت کریں گے۔

نوبیاہتا جوڑے کا کہنا ہے کہ اس ڈیجیٹل شادی کا ایک منفرد فائدہ یہ بھی ہے کہ اس میں وہ لوگ بھی شرکت کرسکیں گے جو آج اس دنیا میں نہیں ہیں۔

دنیش کا کہنا ہے میرے سسر کا گذشتہ سال اپریل میں انتقال ہوگیا تھا جن کا ایک 3 ڈی اوتار بنایا گیا ہے جو ان سے ملتا جلتا ہے، یہ میری ہونے والی بیوی کے لیے خوشی کا باعث بنے گا جبکہ ایسا صرف میٹاورس میں ہی ہوسکتا ہے۔

میٹاورس کیا ہے؟

میٹاورس میں آپ ہر طرح کے ڈیجیٹل ماحول کو جوڑنے والی ورچوئل دنیا میں داخل ہوسکتے ہیں، اس کا احساس حقیقی دنیا کی طرح ہی ہوتا ہے اور اس میں سرحدوں سے پرے اور لامحدود سماجی زندگی کا احساس ہوتا ہے۔