وفاقی وزیر داخلہ شیخ رشید احمد کا کہنا ہے کہ افغانستان میں امن اورمستحکم حکومت کے لیے اپنا کردار ادا کرتے رہیں گے۔

تفصیلات کے مطابق پاکستان میں چین کے سفیر عزت مآب نونگ رونگ کی وزیر داخلہ شیخ رشید احمد کی رہائشگاہ پر آمد ہوئی ہے۔

ملاقات میں پاک چین دوطرفہ تعلقات سمیت خطے کی مجموعی صورت حال پر تبادلہ خیال کیا گیا ہے ، وزیر داخلہ شیخ رشید احمد نے چینی سفیر اور دیگر سفارتی عملے کو ظہرانہ بھی دیا ہے۔

شیخ رشید کا کہنا ہے کہ افغانستان میں تبدیل ہوتے حالات کے پیش نظر ہمارا خطہ اور زیادہ اہمیت اختیار کرچکا ہے، افغانستان میں پائیدار امن خطے کے ترقی اور دنیا کی سلامتی کے لئے اہم ہے۔

ان کا کہنا تھا کہ وزارت داخلہ افغانستان سے نکلنے والوں کو بھر پور معاونت دے رہی ہے ، چینی شہریوں اور پاکستان میں کام کرنے والی چینی کمپنیوں کی سکیورٹی کو مزید بہتر بنائیں گے۔

وزیر داخلہ کا مزید کہنا تھا کہ چینی شہریوں کی حفاظت کے لیے مشترکہ حکمت عملی ترتیب دے رہے ہیں ، پاکستان اور چین کے باہمی تعاون اور ترقی کو دہشت گردوں کے ہاتھوں یرغمال نہیں ہونے دینگے۔

 دوسری جانب چینی سفیر کا کہنا تھا کہ پاکستان میں چینی کمپنیاں مختلف منصوبوں پر کام کررہی ہیں ، چینی شہریوں اور کمپنیوں کے لیے سکیورٹی پرٹوکول مزید سخت کیا جائے گا۔